kiya hai maine aisa kya ki aisa ho gaya hai

kiyā hai maiñ ne aisā kyā ki aisā ho gayā hai

mirā dil mere pahlū meñ parāyā ho gayā hai

vo aa.e to lagā ġham kā mudāvā ho gayā hai

magar ye kyā ki ġham kuchh aur gahrā ho gayā hai

savād-e-shab tire sadqe kuchh aisā ho gayā hai

bhañvar bhī dekhne meñ ab kinārā ho gayā hai

maiñ un kī guftugū se ālam-e-sakta meñ gum thā

vo samjhe un kī bātoñ se dilāsa ho gayā hai

kabhī mauqā mile to guftugū kar luuñ ḳhabar luuñ

ki ḳhud se rabt TuuTe ek arsa ho gayā hai

kabhī un kā nahīñ aanā ḳhabar ke zail meñ thā

magar ab un kā aanā hī tamāshā ho gayā hai

mujhe farhād o majnūñ āfrīñ kahte haiñ 'arshad'

ki ab merā bhī jiine kā irāda ho gayā hai

kiya hai main ne aisa kya ki aisa ho gaya hai

mera dil mere pahlu mein paraya ho gaya hai

wo aae to laga gham ka mudawa ho gaya hai

magar ye kya ki gham kuchh aur gahra ho gaya hai

sawad-e-shab tere sadqe kuchh aisa ho gaya hai

bhanwar bhi dekhne mein ab kinara ho gaya hai

main un ki guftugu se aalam-e-sakta mein gum tha

wo samjhe un ki baaton se dilasa ho gaya hai

kabhi mauqa mile to guftugu kar lun KHabar lun

ki KHud se rabt TuTe ek arsa ho gaya hai

kabhi un ka nahin aana KHabar ke zail mein tha

magar ab un ka aana hi tamasha ho gaya hai

mujhe farhad o majnun aafrin kahte hain 'arshad'

ki ab mera bhi jine ka irada ho gaya hai