kya tajjub ki meri ruh-e-rawan tak pahunche

kyā ta'ajjub ki mirī rūh-e-ravāñ tak pahuñche

pahle koī mire naġhmoñ kī zabāñ tak pahuñche

jab har ik shorish-e-ġham zabt-e-fuġhāñ tak pahuñche

phir ḳhudā jaane ye hañgāma kahāñ tak pahuñche

aañkh tak dil se na aa.e na zabāñ tak pahuñche

baat jis kī hai usī āfat-e-jāñ tak pahuñche

tū jahāñ par thā bahut pahle vahīñ aaj bhī hai

dekh rindān-e-ḳhush-anfās kahāñ tak pahuñche

jo zamāne ko burā kahte haiñ ḳhud haiñ vo bure

kaash ye baat tire gosh-e-girāñ tak pahuñche

baḌh ke rindoñ ne qadam hazrat-e-vā'iz ke liye

girte paḌte jo dar-e-pīr-e-muġhāñ tak pahuñche

tū mire hāl-e-pareshāñ pe bahut tanz na kar

apne gesū bhī zarā dekh kahāñ tak pahuñche

un kā jo farz hai vo ahl-e-siyāsat jāneñ

merā paiġhām mohabbat hai jahāñ tak pahuñche

'ishq kī choT dikhāne meñ kahīñ aatī hai

kuchh ishāre the ki jo lafz-o-bayāñ tak pahuñche

jalve betāb the jo parda-e-fitrat meñ 'jigar'

ḳhud taḌap kar mirī chashm-e-nigarāñ tak pahuñche

kya ta'ajjub ki meri ruh-e-rawan tak pahunche

pahle koi mere naghmon ki zaban tak pahunche

jab har ek shorish-e-gham zabt-e-fughan tak pahunche

phir KHuda jaane ye hangama kahan tak pahunche

aankh tak dil se na aae na zaban tak pahunche

baat jis ki hai usi aafat-e-jaan tak pahunche

tu jahan par tha bahut pahle wahin aaj bhi hai

dekh rindan-e-KHush-anfas kahan tak pahunche

jo zamane ko bura kahte hain KHud hain wo bure

kash ye baat tere gosh-e-giran tak pahunche

baDh ke rindon ne qadam hazrat-e-wa'iz ke liye

girte paDte jo dar-e-pir-e-mughan tak pahunche

tu mere haal-e-pareshan pe bahut tanz na kar

apne gesu bhi zara dekh kahan tak pahunche

un ka jo farz hai wo ahl-e-siyasat jaanen

mera paigham mohabbat hai jahan tak pahunche

'ishq ki choT dikhane mein kahin aati hai

kuchh ishaare the ki jo lafz-o-bayan tak pahunche

jalwe betab the jo parda-e-fitrat mein 'jigar'

KHud taDap kar meri chashm-e-nigaran tak pahunche