koi diwar na dar jaante hain

koī dīvār na dar jānte haiñ

ham isī dasht ko ghar jānte haiñ

jaan kar chup haiñ vagarna ham bhī

baat karne kā hunar jānte haiñ

ye muhim hadiya-e-sar māñgtī hai

is meñ hai jaañ kā ḳhatar jānte haiñ

lad ga.ī shāḳh-e-lahū phūloñ se

ā.eñge ab ke samar jānte haiñ

jaan jaanī hai to jā.egī zarūr

ham duāoñ kā asar jānte haiñ

kaun hai tāba-e-mohmal kis kā

kis kā hai kis pe asar jānte haiñ

log use maslahatan kuchh na kaheñ

us kī auqāt magar jānte haiñ

raat kis kis ke uḌe haiñ purze

shahr meñ kyā hai ḳhabar jānte haiñ

raat kaaTe nahīñ kaTtī hai magar

raat hai tā-ba-sahar jānte haiñ

ham ne bhī dekhī hai duniyā 'mohsin'

hai kidhar kis kī nazar jānte haiñ

koi diwar na dar jaante hain

hum isi dasht ko ghar jaante hain

jaan kar chup hain wagarna hum bhi

baat karne ka hunar jaante hain

ye muhim hadiya-e-sar mangti hai

is mein hai jaan ka KHatar jaante hain

lad gai shaKH-e-lahu phulon se

aaenge ab ke samar jaante hain

jaan jaani hai to jaegi zarur

hum duaon ka asar jaante hain

kaun hai taba-e-mohmal kis ka

kis ka hai kis pe asar jaante hain

log use maslahatan kuchh na kahen

us ki auqat magar jaante hain

raat kis kis ke uDe hain purze

shahr mein kya hai KHabar jaante hain

raat kaTe nahin kaTti hai magar

raat hai ta-ba-sahar jaante hain

hum ne bhi dekhi hai duniya 'mohsin'

hai kidhar kis ki nazar jaante hain