koi le kar KHabar nahin aata

koī le kar ḳhabar nahīñ aatā

jo gayā nāma-bar nahīñ aatā

chāñd kis jā nazar nahīñ aatā

yaar kyuuñ mere ghar nahīñ aatā

dam mohabbat kā bhar nahīñ aatā

raaz ifshā to kar nahīñ aatā

ishq kyā jaane zāhid-e-be-maġhz

Dhañg ye umr-bhar nahīñ aatā

panDito pattre meñ dekho to

kyuuñ mirā nāma-bar nahīñ aatā

laala har saal rañg laatā hai

rañg-e-dāġh-e-jigar nahīñ aatā

vo to kahte haiñ sabr kar chande

aur yahāñ sabr kar nahīñ aatā

kabhī pūchho lipaT ke siine se

ab to muñh ko jigar nahīñ aatā

shīsha-e-dil meñ o parī-paikar

hai parī to utar nahīñ aatā

ham bhī bāteñ banāyā karte haiñ

sher kahnā magar nahīñ aatā

ġhuncha gul ho ke un se kahtā hai

kis kā muñh ko jigar nahīñ aatā

rañg laayā nahīñ abhī ronā

abhī laḳht-e-jigar nahīñ aatā

nāsehā kyuuñ na ho ḳhayāl un kā

ḳhvāb to rāt-bhar nahīñ aatā

umr-bhar ik tumhīñ ko pyaar kiyā

dil kahīñ is qadar nahīñ aatā

mere marne kī kyā nahīñ hai ḳhabar

kyuuñ tū ai be-ḳhabar nahīñ aatā

kyuuñ bigaḌiye bane bane na bane

ḳhair bande ko shar nahīñ aatā

zab.h mujh ko anīle-pan ne kiyā

qatl qātil ko kar nahīñ aatā

kūcha-e-yār hai ki jannat hai

jo gayā phir ke ghar nahīñ aatā

yaar koThe pe apne chaḌhtā hai

mah falak se utar nahīñ aatā

jī na chāhe jise maiñ kyā chāhūñ

mujh ko be-maut mar nahīñ aatā

dekh kar un ko jis ko dekhe 'mehr'

koī itnā nazar nahīñ aatā

koi le kar KHabar nahin aata

jo gaya nama-bar nahin aata

chand kis ja nazar nahin aata

yar kyun mere ghar nahin aata

dam mohabbat ka bhar nahin aata

raaz ifsha to kar nahin aata

ishq kya jaane zahid-e-be-maghz

Dhang ye umr-bhar nahin aata

panDito pattre mein dekho to

kyun mera nama-bar nahin aata

lala har sal rang lata hai

rang-e-dagh-e-jigar nahin aata

wo to kahte hain sabr kar chande

aur yahan sabr kar nahin aata

kabhi puchho lipaT ke sine se

ab to munh ko jigar nahin aata

shisha-e-dil mein o pari-paikar

hai pari to utar nahin aata

hum bhi baaten banaya karte hain

sher kahna magar nahin aata

ghuncha gul ho ke un se kahta hai

kis ka munh ko jigar nahin aata

rang laya nahin abhi rona

abhi laKHt-e-jigar nahin aata

naseha kyun na ho KHayal un ka

KHwab to raat-bhar nahin aata

umr-bhar ek tumhin ko pyar kiya

dil kahin is qadar nahin aata

mere marne ki kya nahin hai KHabar

kyun tu ai be-KHabar nahin aata

kyun bigaDiye bane bane na bane

KHair bande ko shar nahin aata

zabh mujh ko anile-pan ne kiya

qatl qatil ko kar nahin aata

kucha-e-yar hai ki jannat hai

jo gaya phir ke ghar nahin aata

yar koThe pe apne chaDhta hai

mah falak se utar nahin aata

ji na chahe jise main kya chahun

mujh ko be-maut mar nahin aata

dekh kar un ko jis ko dekhe 'mehr'

koi itna nazar nahin aata