koi manzil nahin milti to Thahar jate hain

koī manzil nahīñ miltī to Thahar jaate haiñ

ashk āñkhoñ meñ musāfir kī tarah aate haiñ

kyuuñ tire hijr ke manzar pe sitam Dhāte haiñ

zaḳhm bhī dete haiñ aur ḳhvāb bhī dikhlāte haiñ

ham bhī in bachchoñ kī mānind koī pal jī leñ

ek sikka jo hathelī pe sajā laate haiñ

ye to har roz kā ma.amūl hai hairān ho kyuuñ

pyaas hī piite haiñ ham bhuuk hī ham khāte haiñ

har baḌā bachchoñ ko jiine kī duā detā hai

ham bhī shāyad isī virse kī sazā paate haiñ

sub.h le jaate haiñ ham apnā janāza ghar se

shaam ko phir ise kāñdhoñ pe uThā laate haiñ

shahr kī bhiiḌ meñ kyā ho isī ḳhātir 'āzar'

apnī pahchān ko ham ghar meñ hī chhoḌ aate haiñ

koi manzil nahin milti to Thahar jate hain

ashk aankhon mein musafir ki tarah aate hain

kyun tere hijr ke manzar pe sitam Dhate hain

zaKHm bhi dete hain aur KHwab bhi dikhlate hain

hum bhi in bachchon ki manind koi pal ji len

ek sikka jo hatheli pe saja late hain

ye to har roz ka mamul hai hairan ho kyun

pyas hi pite hain hum bhuk hi hum khate hain

har baDa bachchon ko jine ki dua deta hai

hum bhi shayad isi wirse ki saza pate hain

subh le jate hain hum apna janaza ghar se

sham ko phir ise kandhon pe uTha late hain

shahr ki bhiD mein kya ho isi KHatir 'azar'

apni pahchan ko hum ghar mein hi chhoD aate hain