koshish bhi ye KHilaf-e-tabiat kabhi na ki

koshish bhī ye ḳhilāf-e-tabī.at kabhī na kī

āsān rāstoñ kī siyāhat kabhī na kī

ham ne diloñ ko jiitā hai husn-e-sulūk se

teġh-o-tabar ke bal pe hukūmat kabhī na kī

ham pāsbān-e-amn-o-amāñ hī rahe sadā

ġhārat-garī kī ham ne vakālat kabhī na

bejā navāzishoñ ke na qaa.il kabhī the ham

māl-o-matā' kī koī chāhat kabhī na kī

guzre haiñ kitnī baar sanam-ḳhānoñ se magar

us ke sivā kisī kī ibādat kabhī na kī

haiñ mohtaram hamāre liye ambiyā tamām

ham ne kisī nabī kī ihānat kabhī na kī

jab bhī chale haiñ jāda-e-haq par chale haiñ ham

ham ne munāfiqoñ kī itā.at kabhī na kī

kī haiñ zamīn-e-dil pe mohabbat kī khetiyāñ

fasl-e-hasad kī ham ne zarā.at kabhī na kī

maulā se maġhfirat ke alāva duā meñ 'shād'

kuchh aur māñgne kī jasārat kabhī na kī

koshish bhi ye KHilaf-e-tabiat kabhi na ki

aasan raston ki siyahat kabhi na ki

hum ne dilon ko jita hai husn-e-suluk se

tegh-o-tabar ke bal pe hukumat kabhi na ki

hum pasban-e-amn-o-aman hi rahe sada

ghaarat-gari ki hum ne wakalat kabhi na

beja nawazishon ke na qail kabhi the hum

mal-o-mata' ki koi chahat kabhi na ki

guzre hain kitni bar sanam-KHanon se magar

us ke siwa kisi ki ibaadat kabhi na ki

hain mohtaram hamare liye ambiya tamam

hum ne kisi nabi ki ihanat kabhi na ki

jab bhi chale hain jada-e-haq par chale hain hum

hum ne munafiqon ki itaat kabhi na ki

ki hain zamin-e-dil pe mohabbat ki khetiyan

fasl-e-hasad ki hum ne zaraat kabhi na ki

maula se maghfirat ke alawa dua mein 'shad'

kuchh aur mangne ki jasarat kabhi na ki