kuchh be-nam talluq jinko nam achchha sa dene mein

kuchh be-nām ta.alluq jin ko naam achchhā sā dene meñ

maiñ to saarī bikhar ga.ī huuñ ghar ko ikaTThā rakhne meñ

dā.era manafī musbat kā to apnī jagah mukammal hai

koī barqī-rau dauḌā de is be-jān se naate meñ

kaun ehsās kī lau baḳhshegā rūkhe-phīke manzar ko

kaun piro.egā jazboñ ke motī harf ke dhāge meñ

aisā kyā andher machā hai mere zaḳhm nahīñ bharte

log to paara paara ho kar juḌ jaate haiñ lamhe meñ

rañj kī ik be-mausam Tahnī dil se yuuñ paivasta hai

puurī shāḳh harī ho jaa.e ek sirā chhū lene meñ

uupar se ḳhāmoshī oḌh ke phirte haiñ jo log vahī

dhajjī dhajjī phirte haiñ andar ke pāgal-ḳhāne meñ

sailāboñ kī ret se jis ko tū ne abas namnāk kiyā

dhīre bahtā ik dariyā ban us sahrā ke siine meñ

bārish ek paḌe to bāhar aape se ho jaatī hai

jis maḳhlūq ne āñkheñ kholīñ dhartī ke tah-ḳhāne meñ

kuchh be-nam talluq jin ko nam achchha sa dene mein

main to sari bikhar gai hun ghar ko ikaTTha rakhne mein

daera manafi musbat ka to apni jagah mukammal hai

koi barqi-rau dauDa de is be-jaan se nate mein

kaun ehsas ki lau baKHshega rukhe-phike manzar ko

kaun piroega jazbon ke moti harf ke dhage mein

aisa kya andher macha hai mere zaKHm nahin bharte

log to para para ho kar juD jate hain lamhe mein

ranj ki ek be-mausam Tahni dil se yun paiwasta hai

puri shaKH hari ho jae ek sira chhu lene mein

upar se KHamoshi oDh ke phirte hain jo log wahi

dhajji dhajji phirte hain andar ke pagal-KHane mein

sailabon ki ret se jis ko tu ne abas namnak kiya

dhire bahta ek dariya ban us sahra ke sine mein

barish ek paDe to bahar aape se ho jati hai

jis maKHluq ne aankhen kholin dharti ke tah-KHane mein