kuchh der tak to mujhko nihaara chala gaya

kuchh der tak to mujh ko nihārā chalā gayā

kal sub.h merī aañkh kā taarā chalā gayā

vo ḳhush huā ki us ko ḳhasārā nahīñ huā

maiñ ro rahā thā merā sahārā chalā gayā

vo guftugū ke vāste aaya thā baam par

maiñ chup rahā to uTh ke sitārā chalā gayā

karnā thā intiḳhāb marāsim meñ ishq meñ

maiñ ne sirā bachāyā kinārā chalā gayā

vo pūchhte haiñ kab ḳhudā aayā hai farsh par

ham ne kahā ki tum ko utārā chalā gayā

ham ro rahe haiñ us ko jise koī ġham nahīñ

us ko to kuchh nahīñ thā hamārā chalā gayā

'amrit' tumheñ bhī duniyā barī lagne lag ga.ī

koī to is jahāñ se tumhārā chalā gayā

kuchh der tak to mujh ko nihaara chala gaya

kal subh meri aankh ka tara chala gaya

wo KHush hua ki us ko KHasara nahin hua

main ro raha tha mera sahaara chala gaya

wo guftugu ke waste aaya tha baam par

main chup raha to uTh ke sitara chala gaya

karna tha intiKHab marasim mein ishq mein

main ne sira bachaya kinara chala gaya

wo puchhte hain kab KHuda aaya hai farsh par

hum ne kaha ki tum ko utara chala gaya

hum ro rahe hain us ko jise koi gham nahin

us ko to kuchh nahin tha hamara chala gaya

'amrit' tumhein bhi duniya bari lagne lag gai

koi to is jahan se tumhaara chala gaya