kuchh is tarah se tera gham diye jalata tha

kuchh is tarah se terā ġham diye jalātā thā

ki ḳhāk-e-dil kā har ik zarra jagmagātā thā

isī liye na kiyā talḳhī-e-jahāñ kā galā

tirā ḳhayāl pas-e-parda muskurātā thā

na yaad rakhtā thā mujh ko na bhuul jaatā thā

kabhī kabhī vo mujhe yuuñ bhī āzmātā thā

har aa.ina thā sarāpā hijāb mere liye

maiñ apne aap ko dekhūñ nazar vo aatā thā

nazar churā ke vo guzrā qarīb se lekin

nazar bachā ke mujhe dekhtā bhī jaatā thā

ġhazal ke lahje meñ hotī thī guftugū us se

vazāhatoñ meñ bhī ib.hām rah hī jaatā thā

vahāñ bhī sāya-e-dīvār us kā yaad rahā

ḳhud apnā saaya jahāñ saath chhoḌ jaatā thā

udaas kamra mahaktā thā kis kī yādoñ se

vo kaun shaḳhs thā kyā thā kahāñ se aatā thā

chamakte the dar-o-dīvār ā.inoñ kī tarah

in ā.inoñ meñ koī aks muskurātā thā

ye ḳhvāb hī mirī tanhā.iyoñ kā hāsil thā

ye ḳhvāb hī mirī tanhā.iyāñ baḌhātā thā

kuchh is tarah se tera gham diye jalata tha

ki KHak-e-dil ka har ek zarra jagmagata tha

isi liye na kiya talKHi-e-jahan ka gala

tera KHayal pas-e-parda muskuraata tha

na yaad rakhta tha mujh ko na bhul jata tha

kabhi kabhi wo mujhe yun bhi aazmata tha

har aaina tha sarapa hijab mere liye

main apne aap ko dekhun nazar wo aata tha

nazar chura ke wo guzra qarib se lekin

nazar bacha ke mujhe dekhta bhi jata tha

ghazal ke lahje mein hoti thi guftugu us se

wazahaton mein bhi ibham rah hi jata tha

wahan bhi saya-e-diwar us ka yaad raha

KHud apna saya jahan sath chhoD jata tha

udas kamra mahakta tha kis ki yaadon se

wo kaun shaKHs tha kya tha kahan se aata tha

chamakte the dar-o-diwar aainon ki tarah

in aainon mein koi aks muskuraata tha

ye KHwab hi meri tanhaiyon ka hasil tha

ye KHwab hi meri tanhaiyan baDhata tha