kuchh yahan be-talab nahin milta

kuchh yahāñ be-talab nahīñ miltā

mujh ko vo kyā ajab nahīñ miltā

kuchh chhalaktā hai kuchh bikhartā hai

sab mile to bhī sab nahīñ miltā

haif ab ishq kī dukānoñ par

nāla-e-nīm-shab nahīñ miltā

kab huī shahr-e-dil kī rakhvālī

ek ghar be-naqab nahīñ miltā

dil se ḳhālī hue haiñ jab se paaoñ

DhūñDne se bhī rab nahīñ miltā

qahr ye hai ki ab hasīnoñ meñ

pahle jaisā ġhazab nahīñ miltā

ham nahīñ mānte koī honā

jab tak us kā sabab nahīñ miltā

muddatoñ chūmtī haiñ bas āñkheñ

ek dam lab se lab nahīñ miltā

us ko itnā sañbhāl kar rakkhā

ki mujhe ḳhud bhī ab nahīñ miltā

bahr-e-lazzat hai us kā gum karnā

DhūñDtā huuñ vo jab nahīñ miltā

ab kahāñ paa.eñ nāqa-o-lailā

badduoñ kā arab nahīñ miltā

ahd-o-ehsās kī fasīl hai biich

miir sāhab kā Dhab nahīñ maltā

kuchh yahan be-talab nahin milta

mujh ko wo kya ajab nahin milta

kuchh chhalakta hai kuchh bikharta hai

sab mile to bhi sab nahin milta

haif ab ishq ki dukanon par

nala-e-nim-shab nahin milta

kab hui shahr-e-dil ki rakhwali

ek ghar be-naqab nahin milta

dil se KHali hue hain jab se paon

DhunDne se bhi rab nahin milta

qahr ye hai ki ab hasinon mein

pahle jaisa ghazab nahin milta

hum nahin mante koi hona

jab tak us ka sabab nahin milta

muddaton chumti hain bas aankhen

ek dam lab se lab nahin milta

us ko itna sanbhaal kar rakkha

ki mujhe KHud bhi ab nahin milta

bahr-e-lazzat hai us ka gum karna

DhunDta hun wo jab nahin milta

ab kahan paen naqa-o-laila

badduon ka arab nahin milta

ahd-o-ehsas ki fasil hai bich

mir sahab ka Dhab nahin malta