kya bala ka hai nasha ishq ke paimane mein

kyā balā kā hai nasha ishq ke paimāne meñ

koī hoshiyār nahīñ aql ke kāshāne meñ

Duub jaatā hai mirā jī jo kahūñ qissa-e-dard

niiñd aatī hai mujhī kuuñ mire afsāne meñ

dil mirā zulf kī zanjīr siiñ hai baazī meñ

apne is kaam kā kyā hosh hai dīvāne meñ

kyā maze kā hai tire seb-e-zanaḳhdāñ kā ḳhaal

lazzat-e-meva-e-firdaus hai is daane meñ

is adab-gāh kuuñ tuuñ masjid jāma.a mat bojh

shaiḳh be-bāk na jā gosha-e-mai-ḳhāne meñ

aañkh uThāte hī mire haath siiñ mujh kuuñ le ga.e

ḳhuub ustād ho tum jaan ke le jaane meñ

ḳhush huuñ maiñ sohbat-e-majnūñ siiñ na liyo aql kā naam

āshnā.ī kī kahāñ baas hai begāne meñ

sho.ala hai āb-e-hayāt-e-dil-e-mushtāq 'sirāj'

is samundar siiñ baḌā farq hai parvāne meñ

kya bala ka hai nasha ishq ke paimane mein

koi hoshiyar nahin aql ke kashane mein

Dub jata hai mera ji jo kahun qissa-e-dard

nind aati hai mujhi kun mere afsane mein

dil mera zulf ki zanjir sin hai bazi mein

apne is kaam ka kya hosh hai diwane mein

kya maze ka hai tere seb-e-zanaKHdan ka KHal

lazzat-e-mewa-e-firdaus hai is dane mein

is adab-gah kun tun masjid jama mat bojh

shaiKH be-bak na ja gosha-e-mai-KHane mein

aankh uThate hi mere hath sin mujh kun le gae

KHub ustad ho tum jaan ke le jaane mein

KHush hun main sohbat-e-majnun sin na liyo aql ka nam

aashnai ki kahan bas hai begane mein

shoala hai aab-e-hayat-e-dil-e-mushtaq 'siraj'

is samundar sin baDa farq hai parwane mein