kya koi ganj-e-giran-maya chhupa hai mujh mein

kyā koī ganj-e-girāñ-māya chhupā hai mujh meñ

khojne vaale tū kyā khoj rahā hai mujh meñ

maiñ to ḳhāmosh huuñ hālāt kī saffākī par

jaane phir kaun hai jo chīḳh rahā hai mujh meñ

jis se ho paa.ī na tā-hāl shanāsā.ī mirī

log kahte haiñ ki ik zehn-e-rasā hai mujh meñ

phir masā.il ke yazīd aa.e haiñ bai'at lene

garm phir ma.arka-e-karb-o-balā hai mujh meñ

dosto mujh ko khañgāloge kahāñ tak āḳhir

mā-sivā-karb bhalā dūsrā kyā hai mujh meñ

na koī dard na ehsās na jazba na umang

ye bhī 'rāhī' koī jiine kī adā hai mujh meñ

kya koi ganj-e-giran-maya chhupa hai mujh mein

khojne wale tu kya khoj raha hai mujh mein

main to KHamosh hun haalat ki saffaki par

jaane phir kaun hai jo chiKH raha hai mujh mein

jis se ho pai na ta-haal shanasai meri

log kahte hain ki ek zehn-e-rasa hai mujh mein

phir masail ke yazid aae hain bai'at lene

garm phir marka-e-karb-o-bala hai mujh mein

dosto mujh ko khangaloge kahan tak aaKHir

ma-siwa-karb bhala dusra kya hai mujh mein

na koi dard na ehsas na jazba na umang

ye bhi 'rahi' koi jine ki ada hai mujh mein