kya kya mohabbaton ke zamane badal gae

kyā kyā mohabbatoñ ke zamāne badal ga.e

ab tum kabhī mile ho to aañsū nikal ga.e

fart-e-ġham-e-havādis-e-daurāñ ke bāvajūd

jab bhī tire dayār se guzre machal ga.e

maiñ nukta-chīñ nahīñ huuñ magar ye batā.iye

vo kaun the jo hañs ke guloñ ko masal ga.e

kuchh dast-e-gul-farosh meñ sañvlā ke rah ga.e

kuchh bāġhbāñ kī barq-navāzī se jal ga.e

tum ne hameñ fareb-e-qayādat diyā to hai

lekin kabhī huā hai ki tūfān Tal ga.e

ik vo bhī the jo bah ga.e maujoñ ke saath saath

ik ham bhī haiñ jo khā ke thapeḌe sambhal ga.e

kya kya mohabbaton ke zamane badal gae

ab tum kabhi mile ho to aansu nikal gae

fart-e-gham-e-hawadis-e-dauran ke bawajud

jab bhi tere dayar se guzre machal gae

main nukta-chin nahin hun magar ye bataiye

wo kaun the jo hans ke gulon ko masal gae

kuchh dast-e-gul-farosh mein sanwla ke rah gae

kuchh baghban ki barq-nawazi se jal gae

tum ne hamein fareb-e-qayaadat diya to hai

lekin kabhi hua hai ki tufan Tal gae

ek wo bhi the jo bah gae maujon ke sath sath

ek hum bhi hain jo kha ke thapeDe sambhal gae