kya kya sawal meri nazar puchhti rahi

kyā kyā savāl merī nazar pūchhtī rahī

lekin vo aañkh thī ki barābar jhukī rahī

mele meñ ye nigāh tujhe DhūñDtī rahī

har mah-jabīñ se terā pata pūchhtī rahī

jaate haiñ nā-murād tire āstāñ se ham

ai dost phir mileñge agar zindagī rahī

āñkhoñ meñ tere husn ke jalve base rahe

dil meñ tire ḳhayāl kī bastī basī rahī

ik hashr thā ki dil meñ musalsal bapā rahā

ik aag thī ki dil meñ barābar lagī rahī

maiñ thā kisī kī yaad thī jām-e-sharāb thā

ye vo nashist thī jo sahar tak jamī rahī

shām-e-vidā-e-dost kā aalam na pūchhiye

dil ro rahā thā lab pe hañsī kheltī rahī

khul kar milā na jaam hī us ne koī liyā

'rahbar' mire ḳhulūs meñ shāyad kamī rahī

kya kya sawal meri nazar puchhti rahi

lekin wo aankh thi ki barabar jhuki rahi

mele mein ye nigah tujhe DhunDti rahi

har mah-jabin se tera pata puchhti rahi

jate hain na-murad tere aastan se hum

ai dost phir milenge agar zindagi rahi

aankhon mein tere husn ke jalwe base rahe

dil mein tere KHayal ki basti basi rahi

ek hashr tha ki dil mein musalsal bapa raha

ek aag thi ki dil mein barabar lagi rahi

main tha kisi ki yaad thi jam-e-sharab tha

ye wo nashist thi jo sahar tak jami rahi

sham-e-wida-e-dost ka aalam na puchhiye

dil ro raha tha lab pe hansi khelti rahi

khul kar mila na jam hi us ne koi liya

'rahbar' mere KHulus mein shayad kami rahi