kyun main hail ho jata hun apni hi tanhai mein

kyuuñ maiñ haa.il ho jaatā huuñ apnī hī tanhā.ī meñ

varna ik pur-lutf samāñ hai ḳhud apnī gahrā.ī meñ

fitrat ne atā kī hai be-shak mujh ko bhī kuchh aqal-e-salīm

kaun ḳhalal-andāz huā hai merī har dānā.ī meñ

jhuuT kī namkīnī se bātoñ meñ aa jaatā hai mazā

koī nahīñ letā dilchaspī phīkī sī sachchā.ī meñ

apne the begāne the aur āḳhir meñ ḳhud merī zaat

kis kis kā ikrām huā hai kitnā mirī rusvā.ī meñ

badle badle lagte ho hai chehre par anjānā-pan

yā vaqt ke hāthoñ farq aayā merī hī bīnā.ī meñ

sunñe vāloñ ke chehroñ par surḳh lakīroñ ke haiñ nishāñ

ḳhūnī sochoñ kī āmezish hai naġhmoñ kī shahnā.ī meñ

sab qadreñ pāmāl huiiñ insāñ ne ḳhud ko masḳh kiyā

qudrat ne kitnī mehnat kī thī apnī bazm-ārā.ī meñ

apnī āgāhī kī un ko hotī nahīñ taufīq kabhī

log ḳhudā ko DhūñD rahe haiñ āfāqī pahnā.ī meñ

duniyā kī dānish-gāhoñ meñ aaj ajab ik bahas chhiḌī

kaun bharose ke qābil hai aaqil aur saudā.ī meñ

jaane kis kirdār kī kaa.ī mere ghar meñ aa pahuñchī

ab to 'zafar' chalnā hai mushkil āñgan kī chiknā.ī meñ

kyun main hail ho jata hun apni hi tanhai mein

warna ek pur-lutf saman hai KHud apni gahrai mein

fitrat ne ata ki hai be-shak mujh ko bhi kuchh aqal-e-salim

kaun KHalal-andaz hua hai meri har danai mein

jhuT ki namkini se baaton mein aa jata hai maza

koi nahin leta dilchaspi phiki si sachchai mein

apne the begane the aur aaKHir mein KHud meri zat

kis kis ka ikram hua hai kitna meri ruswai mein

badle badle lagte ho hai chehre par anjaana-pan

ya waqt ke hathon farq aaya meri hi binai mein

sunne walon ke chehron par surKH lakiron ke hain nishan

KHuni sochon ki aamezish hai naghmon ki shahnai mein

sab qadren pamal huin insan ne KHud ko masKH kiya

qudrat ne kitni mehnat ki thi apni bazm-arai mein

apni aagahi ki un ko hoti nahin taufiq kabhi

log KHuda ko DhunD rahe hain aafaqi pahnai mein

duniya ki danish-gahon mein aaj ajab ek bahas chhiDi

kaun bharose ke qabil hai aaqil aur saudai mein

jaane kis kirdar ki kai mere ghar mein aa pahunchi

ab to 'zafar' chalna hai mushkil aangan ki chiknai mein