laD jate hain saron pe machalti qaza se bhi

laḌ jaate haiñ saroñ pe machaltī qazā se bhī

Darte nahīñ charāġh hamāre havā se bhī

barsoñ rahe haiñ raqs-kunāñ jis zamīn par

pahchāntī nahīñ hameñ āvāz-e-pā se bhī

ab is ko iltifāt kahūñ maiñ ki be-ruḳhī

kuchh kuchh haiñ mehrbāñ se bhī kuchh kuchh ḳhafā se bhī

chhup kar na rah sakegā vo ham se ki us ko ham

pahchān leñge us kī kisī ik adā se bhī

dil kaañp kaañp uThtā hai azm-e-gunāh par

mil jaatī hai sazā hameñ pahle ḳhatā se bhī

aksar huā hai ye ki ḳhud apnī talāsh meñ

aage nikal ga.e haiñ had-e-mā-sivā se bhī

laD jate hain saron pe machalti qaza se bhi

Darte nahin charagh hamare hawa se bhi

barson rahe hain raqs-kunan jis zamin par

pahchanti nahin hamein aawaz-e-pa se bhi

ab is ko iltifat kahun main ki be-ruKHi

kuchh kuchh hain mehrban se bhi kuchh kuchh KHafa se bhi

chhup kar na rah sakega wo hum se ki us ko hum

pahchan lenge us ki kisi ek ada se bhi

dil kanp kanp uThta hai azm-e-gunah par

mil jati hai saza hamein pahle KHata se bhi

aksar hua hai ye ki KHud apni talash mein

aage nikal gae hain had-e-ma-siwa se bhi