lahu Tapka kisi ki aarzu se

lahū Tapkā kisī kī aarzū se

hamārī aarzū Tapkī lahū se

ye hai kis kā soyam pūchhā adū se

ki dam hai naak meñ phūloñ kī bū se

vo bachcha parvarish kartī hai ulfat

jo paikāñ porve kī tarah chūse

ye TūTegī havā-e-gul se vaa.iz

mirī tauba ko kyā nisbat vuzū se

use kahte haiñ qumrī tauq-e-ulfat

chhurī lipTī huī hai yaañ gulo se

ye tāsīr-e-mohabbat hai ki Tapkā

hamārā ḳhuuñ tumhārī guftugū se

vo haiñ kyuuñ husn ke parda pe nāzāñ

ye sīkhā hai hamārī guftugū se

kiyā hai dāman-e-mahshar ko afshāñ

uḌe chhīñTe ye kis kis ke lahū se

sunā hai jaam thā jamshed ke paas

are saaqī faqīroñ ke kadū se

vo sharmīlī nigāheñ kah rahī haiñ

haTā do aks ko bhī rū-ba-rū se

lab-e-gul-rañg par hai ḳhāl-e-mushkīñ

magas aur phuul kī pattī ko chūse

'bayāñ' ḳhauf-e-gunah se mar chuke the

magar jaañ aa ga.ī lā-taqnatū se

lahu Tapka kisi ki aarzu se

hamari aarzu Tapki lahu se

ye hai kis ka soyam puchha adu se

ki dam hai nak mein phulon ki bu se

wo bachcha parwarish karti hai ulfat

jo paikan porwe ki tarah chuse

ye TuTegi hawa-e-gul se waiz

meri tauba ko kya nisbat wuzu se

use kahte hain qumri tauq-e-ulfat

chhuri lipTi hui hai yan gulo se

ye tasir-e-mohabbat hai ki Tapka

hamara KHun tumhaari guftugu se

wo hain kyun husn ke parda pe nazan

ye sikha hai hamari guftugu se

kiya hai daman-e-mahshar ko afshan

uDe chhinTe ye kis kis ke lahu se

suna hai jam tha jamshed ke pas

are saqi faqiron ke kadu se

wo sharmili nigahen kah rahi hain

haTa do aks ko bhi ru-ba-ru se

lab-e-gul-rang par hai KHal-e-mushkin

magas aur phul ki patti ko chuse

'bayan' KHauf-e-gunah se mar chuke the

magar jaan aa gai la-taqnatu se