mai-KHane par kale baadal jab ghir ghir kar aate hain

mai-ḳhāne par kaale bādal jab ghir ghir kar aate haiñ

ham bhī āñkhoñ ke paimāne bhar bhar kar chhalkāte haiñ

maiñ jin ko apnā kahtā huuñ kab vo mire kaam aate haiñ

ye saarā sansār hai sapnā sab jhūTe rishte-nāte haiñ

tanhā.ī ke bojhal lamhe ham is tarah bitāte haiñ

dil ham ko detā hai tasallī ham dil ko samjhāte haiñ

jīvan kī gutthī kā sulajhnā kaam hai ik nā-mumkin sā

girheñ paḌtī hī jaatī haiñ ham jitnā suljhāte haiñ

un kī qismat meñ jalnā hai kaun un se kahtā hai jaleñ

parvāne dīpak par aa kar apne-āp jal jaate haiñ

jīvan biitā lekin ab tak maiñ na samajh paayā ye bhed

biite dinoñ kī yaad aate hī aañsū kyuuñ bhar aate haiñ

vo jab apnā sar Dhakte haiñ khul jaate haiñ un ke pair

jo apnī chādar se ziyāda pair apne phailāte haiñ

hotā hai mahsūs ye 'ājiz' shāyad us ne dastak dī

tez havā ke jhoñke jab darvāze se Takrāte haiñ

mai-KHane par kale baadal jab ghir ghir kar aate hain

hum bhi aankhon ke paimane bhar bhar kar chhalkate hain

main jin ko apna kahta hun kab wo mere kaam aate hain

ye sara sansar hai sapna sab jhuTe rishte-nate hain

tanhai ke bojhal lamhe hum is tarah bitate hain

dil hum ko deta hai tasalli hum dil ko samjhate hain

jiwan ki gutthi ka sulajhna kaam hai ek na-mumkin sa

girhen paDti hi jati hain hum jitna suljhate hain

un ki qismat mein jalna hai kaun un se kahta hai jalen

parwane dipak par aa kar apne-ap jal jate hain

jiwan bita lekin ab tak main na samajh paya ye bhed

bite dinon ki yaad aate hi aansu kyun bhar aate hain

wo jab apna sar Dhakte hain khul jate hain un ke pair

jo apni chadar se ziyaada pair apne phailate hain

hota hai mahsus ye 'ajiz' shayad us ne dastak di

tez hawa ke jhonke jab darwaze se Takraate hain