main aa raha tha sitaron pe panw dharte hue

maiñ aa rahā thā sitāroñ pe paañv dharte hue

badan utaar diyā ḳhaak se guzarte hue

jamāl mujh pe ye ik din meñ to nahīñ aayā

hazār aa.ine TuuTe mire sañvarte hue

'ajab nazar se charāġhoñ kī samt dekhā hai

havā ne zīna-e-pindār se utarte hue

ik-ādh jaam to pī hī liyā thā ham ne bhī

ḳhumār-e-ḳhāna-e-duniyā kī sair karte hue

na jaane kyā dil-e-sayyād meñ ḳhayāl aayā

vo ro diyā thā mire bāl-o-par katarte hue

ab āsmān bhī kam paḌ rahe haiñ us ke liye

qadam zamīn pe rakkhā thā jis ne Darte hue

vahī sitāra sitāroñ kā hukmarāñ Thahrā

laraz rahā thā jo pahlī zaqand bharte hue

vo aa.ina thā maiñ tāriq-'na.īm' TuuT ke bhī

hazār aks banātā gayā bikharte hue

main aa raha tha sitaron pe panw dharte hue

badan utar diya KHak se guzarte hue

jamal mujh pe ye ek din mein to nahin aaya

hazar aaine TuTe mere sanwarte hue

'ajab nazar se charaghon ki samt dekha hai

hawa ne zina-e-pindar se utarte hue

ik-adh jam to pi hi liya tha hum ne bhi

KHumar-e-KHana-e-duniya ki sair karte hue

na jaane kya dil-e-sayyaad mein KHayal aaya

wo ro diya tha mere baal-o-par katarte hue

ab aasman bhi kam paD rahe hain us ke liye

qadam zamin pe rakkha tha jis ne Darte hue

wahi sitara sitaron ka hukmaran Thahra

laraz raha tha jo pahli zaqand bharte hue

wo aaina tha main tariq-'naim' TuT ke bhi

hazar aks banata gaya bikharte hue