main apne-ap ko aawaz de raha hun abhi

maiñ apne-āp ko āvāz de rahā huuñ abhī

ġhazal ke haath meñ ik saaz de rahā huuñ abhī

ik ek harf mirī tishnagī kā zāmin hai

ik ek harf ko ejaaz de rahā huuñ abhī

havā kī zad pe koī barg-e-zard hai kab se

so us ke soz ko ik saaz de rahā huuñ abhī

maiñ dar-ba-dar huuñ abhī apnī justujū meñ bahut

maiñ apne lahje ko andāz de rahā huuñ abhī

thamā ke haath meñ un ke fazīlatoñ kī sanad

maiñ jāhiloñ ko bhī e.azāz de rahā huuñ abhī

ajab tilism hai aks-e-niyāz o naqsh-e-havas

maiñ rabt-e-shauq ko āġhāz de rahā huuñ abhī

main apne-ap ko aawaz de raha hun abhi

ghazal ke hath mein ek saz de raha hun abhi

ek ek harf meri tishnagi ka zamin hai

ek ek harf ko ejaz de raha hun abhi

hawa ki zad pe koi barg-e-zard hai kab se

so us ke soz ko ek saz de raha hun abhi

main dar-ba-dar hun abhi apni justuju mein bahut

main apne lahje ko andaz de raha hun abhi

thama ke hath mein un ke fazilaton ki sanad

main jahilon ko bhi eazaz de raha hun abhi

ajab tilism hai aks-e-niyaz o naqsh-e-hawas

main rabt-e-shauq ko aaghaz de raha hun abhi