main bhi huzur-e-yar bahut der tak raha

maiñ bhī huzūr-e-yār bahut der tak rahā

āñkhoñ meñ phir ḳhumār bahut der tak rahā

kal shaam mere qatl kī tārīḳh thī magar

dushman kā intizār bahut der tak rahā

ab le chalā hai dasht meñ merā junūñ mujhe

is jin pe iḳhtiyār bahut der tak rahā

vo inkishāf-e-zāt kā lamha thā khul gayā

shāyad darūn-e-ġhār bahut der tak rahā

ab dekhte ho koī sahārā mile tumheñ

maiñ bhī to ashk-bār bahut der tak rahā

tum maslahat kaho yā munāfiq kaho mujhe

dil meñ magar ġhubār bahut der tak rahā

maiñ ḳhaak āsmāñ kī bulandī ko dekhtā

apnoñ pe e'tibār bahut der tak rahā

ilzām-e-ḳhud-sarī bhī to sābit kiyā gayā

maiñ jab ki ḳhāksār bahut der tak rahā

'sāhil' mirī balā se mirā hashr hogā kyā

duniyā meñ bā-vaqār bahut der tak rahā

main bhi huzur-e-yar bahut der tak raha

aankhon mein phir KHumar bahut der tak raha

kal sham mere qatl ki tariKH thi magar

dushman ka intizar bahut der tak raha

ab le chala hai dasht mein mera junun mujhe

is jin pe iKHtiyar bahut der tak raha

wo inkishaf-e-zat ka lamha tha khul gaya

shayad darun-e-ghaar bahut der tak raha

ab dekhte ho koi sahaara mile tumhein

main bhi to ashk-bar bahut der tak raha

tum maslahat kaho ya munafiq kaho mujhe

dil mein magar ghubar bahut der tak raha

main KHak aasman ki bulandi ko dekhta

apnon pe e'tibar bahut der tak raha

ilzam-e-KHud-sari bhi to sabit kiya gaya

main jab ki KHaksar bahut der tak raha

'sahil' meri bala se mera hashr hoga kya

duniya mein ba-waqar bahut der tak raha