main kya hun mujhe tumne jo aazar pe khincha

maiñ kyā huuñ mujhe tum ne jo āzār pe khīñchā

duniyā ne masīhāoñ ko bhī daar pe khīñchā

zindoñ kā to maskan bhī yahāñ qabr-numā hai

murdoñ ko magar darja-e-autār pe khīñchā

vo jaatā rahā aur maiñ kuchh bol na paayā

chiḌiyoñ ne magar shor sā dīvār pe khīñchā

kuchh bhī na bachā shahr meñ juz rone kī rut ke

har sho.ala-e-āvāz ko malhār pe khīñchā

yūsuf kabhī nīlām huā kartā thā lekin

yūsuf ko bhī is shahr ne hai daar pe khīñchā

phūTe haiñ mere dil meñ phir inkār ke sote

phir dil ne mujhe hālat-e-dushvār pe khīñchā

har shai kī haqīqat meñ utar jaa.eñ ab āñkheñ

zulmat ne mujhe dīda-e-bedār pe khīñchā

dukh ālam-e-insān ke the jo vo chhupā.e

ḳhat chāñd ko sar karne kā aḳhbār pe khīñchā

tum ne to 'faqīh' apnī anā kas ke mujhe bhī

paikāñ kī tarah hālat-e-paikār pe khīñchā

main kya hun mujhe tum ne jo aazar pe khincha

duniya ne masihaon ko bhi dar pe khincha

zindon ka to maskan bhi yahan qabr-numa hai

murdon ko magar darja-e-autar pe khincha

wo jata raha aur main kuchh bol na paya

chiDiyon ne magar shor sa diwar pe khincha

kuchh bhi na bacha shahr mein juz rone ki rut ke

har shoala-e-awaz ko malhaar pe khincha

yusuf kabhi nilam hua karta tha lekin

yusuf ko bhi is shahr ne hai dar pe khincha

phuTe hain mere dil mein phir inkar ke sote

phir dil ne mujhe haalat-e-dushwar pe khincha

har shai ki haqiqat mein utar jaen ab aankhen

zulmat ne mujhe dida-e-bedar pe khincha

dukh aalam-e-insan ke the jo wo chhupae

KHat chand ko sar karne ka aKHbar pe khincha

tum ne to 'faqih' apni ana kas ke mujhe bhi

paikan ki tarah haalat-e-paikar pe khincha