main to tanha tha magar tujhko bhi tanha dekha

maiñ to tanhā thā magar tujh ko bhī tanhā dekhā

apnī tasvīr ke pīchhe tirā chehrā dekhā

jis kī ḳhushbū se mahak jaa.e shabistān-e-visāl

dosto tum ne kabhī vo gul-e-sahrā dekhā

ajnabī ban ke mile dil meñ utartā jaa.e

shahr meñ koī bhī tujh sā na shanāsā dekhā

ab to bas ek hī ḳhvāhish hai ki tujh ko dekheñ

saarī duniyā meñ phire aur na kyā kyā dekhā

koī sūrat bhī shanāsā nazar aa.ī na hameñ

ghar se nikle to ajab shahr kā naqsha dekhā

is qadar dhuup thī sañvlā ga.e raḳhshāñ chehre

jalte sūraj kā magar rañg bhī piilā dekhā

peḌ kā dukh to koī pūchhne vaalā hī na thā

apnī hī aag meñ jaltā huā saaya dekhā

the añdheroñ ke ta.āqub meñ ujāle kyā kyā

ḳhud tamāsha the 'jamīl' aur tamāsha dekhā

main to tanha tha magar tujh ko bhi tanha dekha

apni taswir ke pichhe tera chehra dekha

jis ki KHushbu se mahak jae shabistan-e-visal

dosto tum ne kabhi wo gul-e-sahra dekha

ajnabi ban ke mile dil mein utarta jae

shahr mein koi bhi tujh sa na shanasa dekha

ab to bas ek hi KHwahish hai ki tujh ko dekhen

sari duniya mein phire aur na kya kya dekha

koi surat bhi shanasa nazar aai na hamein

ghar se nikle to ajab shahr ka naqsha dekha

is qadar dhup thi sanwla gae raKHshan chehre

jalte suraj ka magar rang bhi pila dekha

peD ka dukh to koi puchhne wala hi na tha

apni hi aag mein jalta hua saya dekha

the andheron ke taaqub mein ujale kya kya

KHud tamasha the 'jamil' aur tamasha dekha