makan-e-KHwab mein jangal ki bas rahne lagi

makān-e-ḳhvāb meñ jangal kī baas rahne lagī

koī na aayā to zīnoñ pe ghaas rahne lagī

tire vajūd kā jab se libās rahne lagī

liye diye hue mujh se kapās rahne lagī

ye aur baat anokhī sī pyaas rahne lagī

mirī zabān pe us kī miThās rahne lagī

jhalak thī yā koī ḳhushbū-e-ḳhadd-o-ḳhāl thī vo

chalī ga.ī to mire aas paas rahne lagī

gayā hujūm liye bāz-dīd naqsh-e-qadam

havā-e-rāhguzar bad-havās rahne lagī

zarā.e jo the mayassar hue ġhubār-e-shanāḳht

darūñ se chashm-e-darūñ nā-shanās rahne lagī

abhī ġhubār na utrā thā saañs kā andar

utarne kī pas-e-zindāñ bhaḌās rahne lagī

utaar pheñk diyā jo thā jism-e-bosīda

sitāroñ kī koī utran libās rahne lagī

ziyāda zor lagāne se kuchh na ho saktā

so aa.e roz kī halchal hī raas rahne lagī

lahad ne dāman-e-yaḳh-basta khol kar rakkhā

badan meñ garmī-e-ḳhauf-o-hirās rahne lagī

na jaane andhe kuoñ kī vo tishnagī thī kyā

har ek aañkh meñ jo be-libās rahne lagī

bigāḌ jis se ho paidā koī bigāḌ nahīñ

so mo.ajize kī mire dil ko aas rahne lagī

muġhā.irat se bharī tīrgī ke biich 'naved'

ik andarūnī ramaq rū-shanās rahne lagī

makan-e-KHwab mein jangal ki bas rahne lagi

koi na aaya to zinon pe ghas rahne lagi

tere wajud ka jab se libas rahne lagi

liye diye hue mujh se kapas rahne lagi

ye aur baat anokhi si pyas rahne lagi

meri zaban pe us ki miThas rahne lagi

jhalak thi ya koi KHushbu-e-KHadd-o-KHal thi wo

chali gai to mere aas pas rahne lagi

gaya hujum liye baz-did naqsh-e-qadam

hawa-e-rahguzar bad-hawas rahne lagi

zarae jo the mayassar hue ghubar-e-shanaKHt

darun se chashm-e-darun na-shanas rahne lagi

abhi ghubar na utra tha sans ka andar

utarne ki pas-e-zindan bhaDas rahne lagi

utar phenk diya jo tha jism-e-bosida

sitaron ki koi utran libas rahne lagi

ziyaada zor lagane se kuchh na ho sakta

so aae roz ki halchal hi ras rahne lagi

lahad ne daman-e-yaKH-basta khol kar rakkha

badan mein garmi-e-KHauf-o-hiras rahne lagi

na jaane andhe kuon ki wo tishnagi thi kya

har ek aankh mein jo be-libas rahne lagi

bigaD jis se ho paida koi bigaD nahin

so moajize ki mere dil ko aas rahne lagi

mughairat se bhari tirgi ke bich 'nawed'

ek andaruni ramaq ru-shanas rahne lagi