maqam-e-admi kuchh kam nahin hai

maqām-e-ādmī kuchh kam nahīñ hai

farishtoñ se to kam aadam nahīñ hai

abhī dil jal rahā hai aa bhī jaao

ujālā chāñd se maddham nahīñ hai

hamārī zaat par uñglī uThā.e

zamāne meñ abhī vo dam nahīñ hai

uḌātā hai havā meñ kyoñ divāne

ye dāman hai koī parcham nahīñ hai

tirī marzī hai saaqī jis qadar de

hameñ to fikr-e-besh-o-kam nahīñ hai

butoñ kī bandagī meñ kaun jaane

kahāñ hai ḳham kahāñ sar ḳham nahīñ hai

unheñ gar naaz hai apnī pahuñch par

to merī bhī rasā.ī kam nahīñ hai

koī kyoñ ġham-gusār 'mehr' hogā

zamāna monis-o-hamdam nahīñ hai

maqam-e-admi kuchh kam nahin hai

farishton se to kam aadam nahin hai

abhi dil jal raha hai aa bhi jao

ujala chand se maddham nahin hai

hamari zat par ungli uThae

zamane mein abhi wo dam nahin hai

uData hai hawa mein kyon diwane

ye daman hai koi parcham nahin hai

teri marzi hai saqi jis qadar de

hamein to fikr-e-besh-o-kam nahin hai

buton ki bandagi mein kaun jaane

kahan hai KHam kahan sar KHam nahin hai

unhen gar naz hai apni pahunch par

to meri bhi rasai kam nahin hai

koi kyon gham-gusar 'mehr' hoga

zamana monis-o-hamdam nahin hai