maqtal-e-jaan se ki zindan se ki ghar se nikle

maqtal-e-jāñ se ki zindāñ se ki ghar se nikle

ham to ḳhushbū kī tarah nikle jidhar se nikle

gar qayāmat ye nahīñ hai to qayāmat kyā hai

shahr jaltā rahā aur log na ghar se nikle

jaane vo kaun sī manzil thī mohabbat kī jahāñ

mere aañsū bhī tire dīda-e-tar se nikle

dar-ba-darī kā hameñ ta.ana na de ai chashm-e-ġhazāl

dekh vo ḳhvāb ki jis ke liye ghar se nikle

merā rahzan huā kyā kyā na pashemān ki jab

is ke naame mere asbāb-e-safar se nikle

bar-sar-e-dosh rahe yā sar-e-neza yā-rab

haq-parastī kā na saudā kabhī sar se nikle

maqtal-e-jaan se ki zindan se ki ghar se nikle

hum to KHushbu ki tarah nikle jidhar se nikle

gar qayamat ye nahin hai to qayamat kya hai

shahr jalta raha aur log na ghar se nikle

jaane wo kaun si manzil thi mohabbat ki jahan

mere aansu bhi tere dida-e-tar se nikle

dar-ba-dari ka hamein tana na de ai chashm-e-ghazal

dekh wo KHwab ki jis ke liye ghar se nikle

mera rahzan hua kya kya na pasheman ki jab

is ke name mere asbab-e-safar se nikle

bar-sar-e-dosh rahe ya sar-e-neza ya-rab

haq-parasti ka na sauda kabhi sar se nikle