masruf hum bhi anjuman-araiyon mein the

masrūf ham bhī anjuman-ārā.iyoñ meñ the

ghar jal rahā thā log tamāshā.iyoñ meñ the

kitnī jarāhateñ pas-e-ehsās-e-dard thiiñ

kitne hī zaḳhm ruuh kī gahrā.iyoñ meñ the

kuchh ḳhvāb the jo ek se manzar kā aks the!

kuchh shobade bhī us kī masīhā.iyoñ meñ the

taptī zamīñ pe uḌte bagūloñ kā raqs thā

saat āsmān qahr kī purvā.iyoñ meñ the

is tarah ḳhair o shar meñ kabhī ran paḌā na thā

kitne hī hādse mirī paspā.iyoñ meñ the

ḳhilqat pe sādgī kā maiñ ilzām kyā dharūñ

jitne shigāf the mirī dānā.iyoñ meñ the

āshob-e-zāt se nikal aayā thā ik jahāñ

ham qaid apnī qāfiya-paimā.iyoñ meñ the

masruf hum bhi anjuman-araiyon mein the

ghar jal raha tha log tamashaiyon mein the

kitni jarahaten pas-e-ehsas-e-dard thin

kitne hi zaKHm ruh ki gahraiyon mein the

kuchh KHwab the jo ek se manzar ka aks the!

kuchh shobade bhi us ki masihaiyon mein the

tapti zamin pe uDte bagulon ka raqs tha

sat aasman qahr ki purwaiyon mein the

is tarah KHair o shar mein kabhi ran paDa na tha

kitne hi hadse meri paspaiyon mein the

KHilqat pe sadgi ka main ilzam kya dharun

jitne shigaf the meri danaiyon mein the

aashob-e-zat se nikal aaya tha ek jahan

hum qaid apni qafiya-paimaiyon mein the