mere hathon mein nahin koi hunar ab ke baras

mere hāthoñ meñ nahīñ koī hunar ab ke baras

jaane kis ism pe khultā hai ye dar ab ke baras

kuchh to bhugtā ga.e nā-karda gunāhoñ kī sazā

zad pe āñdhī ke haiñ kuchh aur shajar ab ke baras

raqs aaseb kā jaarī hai mire shahroñ meñ

kis ko darkār hai kis shaḳhs kā sar ab ke baras

jī jalā.egā ye āvāra o be-dar honā

dil dukhā.eñge ye mahke hue ghar ab ke baras

terī ulfat tirī chāhat tirī shafqat ke tufail

kitnā barsegā mirā dīda-e-tar ab ke baras

mujh ko chhū mere shab-o-roz ko raushan kar de

mere āñgan meñ bhī pal bhar ko Thahar ab ke baras

tū ne har baar bahut ḳhud ko bigāḌā 'arshī'

merī gar maan to jī bhar ke sañvar ab ke baras

mere hathon mein nahin koi hunar ab ke baras

jaane kis ism pe khulta hai ye dar ab ke baras

kuchh to bhugta gae na-karda gunahon ki saza

zad pe aandhi ke hain kuchh aur shajar ab ke baras

raqs aaseb ka jari hai mere shahron mein

kis ko darkar hai kis shaKHs ka sar ab ke baras

ji jalaega ye aawara o be-dar hona

dil dukhaenge ye mahke hue ghar ab ke baras

teri ulfat teri chahat teri shafqat ke tufail

kitna barsega mera dida-e-tar ab ke baras

mujh ko chhu mere shab-o-roz ko raushan kar de

mere aangan mein bhi pal bhar ko Thahar ab ke baras

tu ne har bar bahut KHud ko bigaDa 'arshi'

meri gar man to ji bhar ke sanwar ab ke baras