mera KHulus abhi saKHt imtihan mein hai

mirā ḳhulūs abhī saḳht imtihān meñ hai

ki mere dost kā dushman mirī amaan meñ hai

vo ḳhush-nasīb parinda hai jo uḌaan meñ hai

ki tiir niklā nahīñ hai abhī kamān meñ hai

tumhārā naam liyā thā kabhī mohabbat se

miThās us kī abhī tak mirī zabān meñ hai

tum aake lauT ga.e phir bhī ho yahīñ maujūd

tumhāre jism kī ḳhushbū mire makān meñ hai

kahāñ milegā hasīnoñ ko daur-e-hāzir meñ

vo shāhzāda jo pariyoñ kī dāstān meñ hai

hai jism saḳht magar dil bahut hī nāzuk hai

ki jaise aa.ina mahfūz ik chaTTān meñ hai

tujhe jo zaḳhm de tū us ko phuul de 'dānā'

yahī usūl-e-vafā tere ḳhāndān meñ hai

mera KHulus abhi saKHt imtihan mein hai

ki mere dost ka dushman meri aman mein hai

wo KHush-nasib parinda hai jo uDan mein hai

ki tir nikla nahin hai abhi kaman mein hai

tumhaara nam liya tha kabhi mohabbat se

miThas us ki abhi tak meri zaban mein hai

tum aake lauT gae phir bhi ho yahin maujud

tumhaare jism ki KHushbu mere makan mein hai

kahan milega hasinon ko daur-e-hazir mein

wo shahzada jo pariyon ki dastan mein hai

hai jism saKHt magar dil bahut hi nazuk hai

ki jaise aaina mahfuz ek chaTTan mein hai

tujhe jo zaKHm de tu us ko phul de 'dana'

yahi usul-e-wafa tere KHandan mein hai