mere dil mein hai ki puchhun kabhi murshid-e-mughan se

mire dil meñ hai ki pūchhūñ kabhī murshid-e-muġhāñ se

ki milā jamāl-e-sāqī ko ye tantana kahāñ se

vo ye kah rahe haiñ ham ko tire haal kī ḳhabar kyā

tū uThā sakā nigāheñ na batā sakā zabāñ se

jo unheñ vafā kī sūjhī to na ziist ne vafā kī

abhī aa ke vo na baiThe ki ham uTh ga.e jahāñ se

maiñ 'adam ke lāla-zāroñ meñ navā-gar-e-azal thā

mujhe khīñch laa.ī zālim tirī aarzū kahāñ se

mirī sarnavisht meñ thā vahī dāġh-e-nā-murādī

jo milā mirī jabīñ ko tire sañg-e-āstāñ se

bache bijliyoñ kī zad se vahī tā.erān-e-dānā

jo kaḌak chamak se pahle nikal aa.e āshiyāñ se

ye hai mājrā-e-vahshat ki milā surāġh-e-mahmil

na ġhubār-e-kārvāñ se na darā-e-kārvāñ se

nahīñ kuchh samajh meñ aatā ye 'ajīb mājrā hai

ki zamīñ ke rahne vāloñ ko hidāyat āsmāñ se

shab-e-ġham jo aa.ī 'sālik' miTe bātinī añdhere

mirā dil huā munavvar tab-o-tāb-e-jāvedāñ se

mere dil mein hai ki puchhun kabhi murshid-e-mughan se

ki mila jamal-e-saqi ko ye tantana kahan se

wo ye kah rahe hain hum ko tere haal ki KHabar kya

tu uTha saka nigahen na bata saka zaban se

jo unhen wafa ki sujhi to na zist ne wafa ki

abhi aa ke wo na baiThe ki hum uTh gae jahan se

main 'adam ke lala-zaron mein nawa-gar-e-azal tha

mujhe khinch lai zalim teri aarzu kahan se

meri sarnawisht mein tha wahi dagh-e-na-muradi

jo mila meri jabin ko tere sang-e-astan se

bache bijliyon ki zad se wahi taeran-e-dana

jo kaDak chamak se pahle nikal aae aashiyan se

ye hai majra-e-wahshat ki mila suragh-e-mahmil

na ghubar-e-karwan se na dara-e-karwan se

nahin kuchh samajh mein aata ye 'ajib majra hai

ki zamin ke rahne walon ko hidayat aasman se

shab-e-gham jo aai 'salik' miTe baatini andhere

mera dil hua munawwar tab-o-tab-e-jawedan se