mere wajud abhi na-tawan nahin hona

mire vajūd abhī nā-tavāñ nahīñ honā

phir is ke ba.ad ye mausam javāñ nahīñ honā

kise ḳhabar thī ki mahshar kā hogā ye bhī rang

zamīñ kā honā magar āsmāñ nahīñ honā

hameñ ḳhabar hai ki vahshat Thikāne lagnī hai

hamārā josh abhī rā.egāñ nahīñ honā

vajūd apnā hai aur aap tai kareñge ham

kahāñ pe honā hai ham ko kahāñ nahīñ honā

ab is ke ba.ad sakat kuchh nahīñ rahī mujh meñ

ab is se aage kā qissa bayāñ nahīñ honā

hamārī bastī kā dukh hai hamīñ se pūchho miyāñ

ki qabreñ honī magar āstāñ nahīñ honā

maqām-e-shukr hai mere liye ki mere murīd

ye terā aaj mirā qadr-dāñ nahīñ honā

maiñ ḳhāndān kā sab se baḌā madārī huuñ

tamāsha hotā rahegā yahāñ nahīñ honā

bas itnī duurī mayassar rahegī donoñ ko

ki fāsla bhī koī darmiyāñ nahīñ honā

ajab azaab thā ki apne shahr-e-armāñ meñ

hamāre vāste jā-e-amāñ nahīñ honā

ye zulm hai ki munādī ho imtihānoñ kī

phir is ke ba.ad koī imtihāñ nahīñ honā

ajab supurdagī-e-jāñ kā marhala thā 'alī'

hamāre hone kā ham ko gumāñ nahīñ honā

mere wajud abhi na-tawan nahin hona

phir is ke baad ye mausam jawan nahin hona

kise KHabar thi ki mahshar ka hoga ye bhi rang

zamin ka hona magar aasman nahin hona

hamein KHabar hai ki wahshat Thikane lagni hai

hamara josh abhi raegan nahin hona

wajud apna hai aur aap tai karenge hum

kahan pe hona hai hum ko kahan nahin hona

ab is ke baad sakat kuchh nahin rahi mujh mein

ab is se aage ka qissa bayan nahin hona

hamari basti ka dukh hai hamin se puchho miyan

ki qabren honi magar aastan nahin hona

maqam-e-shukr hai mere liye ki mere murid

ye tera aaj mera qadr-dan nahin hona

main KHandan ka sab se baDa madari hun

tamasha hota rahega yahan nahin hona

bas itni duri mayassar rahegi donon ko

ki fasla bhi koi darmiyan nahin hona

ajab azab tha ki apne shahr-e-arman mein

hamare waste ja-e-aman nahin hona

ye zulm hai ki munadi ho imtihanon ki

phir is ke baad koi imtihan nahin hona

ajab supurdagi-e-jaan ka marhala tha 'ali'

hamare hone ka hum ko guman nahin hona