miTTi ki imarat saya de kar miTTi mein hamwar hui

miTTī kī imārat saaya de kar miTTī meñ hamvār huī

vīrānī se ab kaam hai aur vīrānī kis kī yaar huī

har pattī bojhal ho ke girī sab shāḳheñ jhuk kar TuuT ga.iiñ

us bārish hī se fasl ujḌī jis bārish se tayyār huī

Dar Dar ke qadam yuuñ rakhtā huuñ ḳhvāboñ ke sahrā meñ jaise

ye reg abhī zanjīr banī ye chhāñv abhī dīvār huī

chhūtī hai zarā jab tan ko havā chubhte haiñ ragoñ meñ kāñTe se

sau baar ḳhizāñ aa.ī hogī mahsūs magar is baar huī

ab ye bhī nahīñ hai bas meñ ki ham phūloñ kī Dagar par lauT chaleñ

jis rāhguzar par chalnā hai vo rāhguzar talvār huī

ik ġhuncha sahar ke arse meñ aisā bhī thā jo kah guzrā

is arz-e-ḳhush-guftārāñ par taḳhlīq-e-jars be-kār huī

ham saath chale the sūraj ke so is kā ye ḳhamyāza hai

sūraj to nikal kar duur gayā ab apnī shaam ġhubār huī

vo naale haiñ be-tābī ke chīḳh uThtā hai sannāTā bhī

ye dard kī shab mālūm nahīñ kab tak ke liye bedār huī

ab tez havā kitnī hī chale ab garm fazā kitnī hī rahe

siine kā zaḳhm charāġh banā dāman kī aag bahār huī

miTTi ki imarat saya de kar miTTi mein hamwar hui

virani se ab kaam hai aur virani kis ki yar hui

har patti bojhal ho ke giri sab shaKHen jhuk kar TuT gain

us barish hi se fasl ujDi jis barish se tayyar hui

Dar Dar ke qadam yun rakhta hun KHwabon ke sahra mein jaise

ye reg abhi zanjir bani ye chhanw abhi diwar hui

chhuti hai zara jab tan ko hawa chubhte hain ragon mein kanTe se

sau bar KHizan aai hogi mahsus magar is bar hui

ab ye bhi nahin hai bas mein ki hum phulon ki Dagar par lauT chalen

jis rahguzar par chalna hai wo rahguzar talwar hui

ek ghuncha sahar ke arse mein aisa bhi tha jo kah guzra

is arz-e-KHush-guftaran par taKHliq-e-jars be-kar hui

hum sath chale the suraj ke so is ka ye KHamyaza hai

suraj to nikal kar dur gaya ab apni sham ghubar hui

wo nale hain be-tabi ke chiKH uThta hai sannaTa bhi

ye dard ki shab malum nahin kab tak ke liye bedar hui

ab tez hawa kitni hi chale ab garm faza kitni hi rahe

sine ka zaKHm charagh bana daman ki aag bahaar hui