muddat se ye aalam hai dil ka hansta bhi nahin rota bhi nahin

muddat se ye aalam hai dil kā hañstā bhī nahīñ rotā bhī nahīñ

maazī bhī kabhī dil meñ na chubhā ā.inda kā sochā bhī nahīñ

vo mere hoñT pe likkhā hai jo harf mukammal ho na sakā

vo merī aañkh meñ bastā hai jo ḳhvāb kabhī dekhā bhī nahīñ

chalte chalte kuchh tham jaanā phir bojhal qadmoñ se chalnā

ye kaisī kasak sī baaqī hai jab paañv meñ vo kāñTā bhī nahīñ

dhuñdlā.ī huī shāmoñ meñ koī parchhā.īñ sī phirtī rahtī hai

maiñ aahaT suntī huuñ jis kī vo vahm nahīñ saaya bhī nahīñ

taz.īn-e-lab-o-gesū kaisī pindār kā shīsha TuuT gayā

thī jis ke liye sab ārā.ish us ne to hameñ dekhā bhī nahīñ

muddat se ye aalam hai dil ka hansta bhi nahin rota bhi nahin

mazi bhi kabhi dil mein na chubha aainda ka socha bhi nahin

wo mere honT pe likkha hai jo harf mukammal ho na saka

wo meri aankh mein basta hai jo KHwab kabhi dekha bhi nahin

chalte chalte kuchh tham jaana phir bojhal qadmon se chalna

ye kaisi kasak si baqi hai jab panw mein wo kanTa bhi nahin

dhundlai hui shamon mein koi parchhain si phirti rahti hai

main aahaT sunti hun jis ki wo wahm nahin saya bhi nahin

tazin-e-lab-o-gesu kaisi pindar ka shisha TuT gaya

thi jis ke liye sab aaraish us ne to hamein dekha bhi nahin