mujhse kahte ho kya kahenge aap

mujh se kahte ho kyā kaheñge aap

jo kahūñgā to kyā suneñge aap

kyā bayān-e-shab-e-firāq kareñ

na sunā hai na ab suneñge aap

nahīñ khultā sabab tabassum kā

aaj kyā koī bosa deñge aap

nāsehā aap ḳhud hī nādāñ haiñ

kyā nasīhat mujhe kareñge aap

dam-e-āḳhir ye thā mire lab par

kis pe jaur-o-sitam kareñge aap

zulm kī kuchh bhī intihā hogī

yā hamesha sitam kareñge aap

muntazir haiñ tumhāre muddat se

dekhiye ham se kab mileñge aap

dard nā-gufta-bah ho jab saaqī

vo suneñ bhī to kyā kaheñge aap

mujh se kahte ho kya kahenge aap

jo kahunga to kya sunenge aap

kya bayan-e-shab-e-firaq karen

na suna hai na ab sunenge aap

nahin khulta sabab tabassum ka

aaj kya koi bosa denge aap

naseha aap KHud hi nadan hain

kya nasihat mujhe karenge aap

dam-e-aKHir ye tha mere lab par

kis pe jaur-o-sitam karenge aap

zulm ki kuchh bhi intiha hogi

ya hamesha sitam karenge aap

muntazir hain tumhaare muddat se

dekhiye hum se kab milenge aap

dard na-gufta-bah ho jab saqi

wo sunen bhi to kya kahenge aap