munafa mushtarak hai aur KHasare ek jaise hain

munāf.a mushtarak hai aur ḳhasāre ek jaise haiñ

ki ham donoñ kī qismat ke sitāre ek jaise haiñ

maiñ ik chhoTā sā afsar huuñ vo ik moTā sā ''mil-owner''

magar donoñ ke income goshvāre ek jaise haiñ

ise zo.af-e-basīrat use zo.af-e-basārat hai

hamāre dīda-var saare ke saare ek jaise haiñ

mutton aur daal kī qīmat barābar ho ga.ī jab se

yaqīñ aayā ki donoñ meñ ''harāre'' ek jaise haiñ

jahāñ bhar ke siyāsī dañgloñ meñ ham ne dekhā hai

''anūkī'' ik se ik ūñchā hai ''jhāre'' ek jaise haiñ

vo thāna ho shifā-ḳhāna ho yā phir Dāk-ḳhāna ho

rifāh-e-ām ke saare idāre ek jaise haiñ

surūr-e-jāñ-fazā detī hai āġhosh-e-vatan sab ko

ki jaise bhī hoñ bachche maañ ko pyāre ek jaise haiñ

balā kā farq hai london kī gorī aur kaalī meñ

magar donoñ kī āñkhoñ meñ ishāre ek jaise haiñ

har ik begam agarche munfarid hai apnī saj-dhaj meñ

magar jitne bhī shauhar haiñ bichāre ek jaise haiñ

koī ḳhush-zauq hī 'shāhid' ye nukta jaan saktā hai

ki mere sher aur naḳhre tumhāre ek jaise haiñ

gumāñ hotā hai 'shāhid' radio par sun ke mausīqī

ki pakke raag aur namkīñ ġharāre ek jaise haiñ

munafa mushtarak hai aur KHasare ek jaise hain

ki hum donon ki qismat ke sitare ek jaise hain

main ek chhoTa sa afsar hun wo ek moTa sa mil-owner

magar donon ke income goshware ek jaise hain

ise zoaf-e-basirat use zoaf-e-basarat hai

hamare dida-war sare ke sare ek jaise hain

mutton aur dal ki qimat barabar ho gai jab se

yaqin aaya ki donon mein harare ek jaise hain

jahan bhar ke siyasi danglon mein hum ne dekha hai

anuki ek se ek uncha hai jhaare ek jaise hain

wo thana ho shifa-KHana ho ya phir Dak-KHana ho

rifah-e-am ke sare idare ek jaise hain

surur-e-jaan-faza deti hai aaghosh-e-watan sab ko

ki jaise bhi hon bachche man ko pyare ek jaise hain

bala ka farq hai london ki gori aur kali mein

magar donon ki aankhon mein ishaare ek jaise hain

har ek begam agarche munfarid hai apni saj-dhaj mein

magar jitne bhi shauhar hain bichaare ek jaise hain

koi KHush-zauq hi 'shahid' ye nukta jaan sakta hai

ki mere sher aur naKHre tumhaare ek jaise hain

guman hota hai 'shahid' radio par sun ke mausiqi

ki pakke rag aur namkin gharare ek jaise hain