muntashir har shai qarine se saja di jaegi

muntashir har shai qarīne se sajā dī jā.egī

yā mire kamre kī shaḳhsiyyat miTā dī jā.egī

saath rakhiye kaam aa.egā bahut nām-e-ḳhudā

ḳhauf gar jaagā to phir kis ko sadā dī jā.egī

aag bhaḌkegī havā pā kar baḌā sach ye nahīñ

sach baḌā ye hai ki sho.aloñ ko havā dī jā.egī

be-Thikāna yuuñ kiyā jā.egā ik jaltā charāġh

tāqche meñ mom kī guḌiyā biThā dī jā.egī

aa.ina hālāt kā aa.egā jo bhī dekhne

koī umda sī ġhazal us ko sunā dī jā.egī

bolne par koī pābandī nahīñ kuchh boliye

haañ magar āvāz uTThegī dabā dī jā.egī

sar-ba-kaf ho jā.eñge pīr-o-javāñ sab dekhnā

desh kī ḳhātir matā-e-jāñ luTā dī jā.egī

ġhair-mumkin kuchh nahīñ duniyā meñ lekin 'ehtirām'

aap kī sohbat bhalā kaise bhulā dī jā.egī

muntashir har shai qarine se saja di jaegi

ya mere kamre ki shaKHsiyyat miTa di jaegi

sath rakhiye kaam aaega bahut nam-e-KHuda

KHauf gar jaga to phir kis ko sada di jaegi

aag bhaDkegi hawa pa kar baDa sach ye nahin

sach baDa ye hai ki shoalon ko hawa di jaegi

be-Thikana yun kiya jaega ek jalta charagh

taqche mein mom ki guDiya biTha di jaegi

aaina haalat ka aaega jo bhi dekhne

koi umda si ghazal us ko suna di jaegi

bolne par koi pabandi nahin kuchh boliye

han magar aawaz uTThegi daba di jaegi

sar-ba-kaf ho jaenge pir-o-jawan sab dekhna

desh ki KHatir mata-e-jaan luTa di jaegi

ghair-mumkin kuchh nahin duniya mein lekin 'ehtiram'

aap ki sohbat bhala kaise bhula di jaegi