mushkil se chaman mein hamein ek bar mila phul

mushkil se chaman meñ hameñ ek baar milā phuul

bas haath lagāyā thā ki Tahnī se jhaḌā phuul

ḳhushbū jo nahīñ hai na sahī rañg to dekho

bāloñ meñ sajā lo koī kāġhaz kā banā phuul

is shab ko chamak kī nahīñ hājat se mahak kī

āñkhoñ se sitāre nahīñ hoñToñ se girā phuul

ab tak tire hoñToñ pe tabassum kā gumāñ hai

ham ko to hai mahbūb yahī ādh-khilā phuul

is dhuup kī shiddat meñ bhī be-āb haiñ paude

hālāt yahī haiñ to gumāñ hai ki gayā phuul

mushkil se chaman mein hamein ek bar mila phul

bas hath lagaya tha ki Tahni se jhaDa phul

KHushbu jo nahin hai na sahi rang to dekho

baalon mein saja lo koi kaghaz ka bana phul

is shab ko chamak ki nahin hajat se mahak ki

aankhon se sitare nahin honTon se gira phul

ab tak tere honTon pe tabassum ka guman hai

hum ko to hai mahbub yahi aadh-khila phul

is dhup ki shiddat mein bhi be-ab hain paude

haalat yahi hain to guman hai ki gaya phul