na apna baqi ye tan rahega na tan mein tab o tawan rahegi

na apnā baaqī ye tan rahegā na tan meñ taab o tavāñ rahegī

agar judā.ī meñ jaañ rahegī tumhīñ batāo kahāñ rahegī

mizha ke tīroñ se chhān dil ko jo chhānñī ho nigah ko gahrī

khiñchī huī dil se kab talak yuuñ tirī bhavoñ kī kamāñ rahegī

ḳhudā ne muñh meñ zabān dī hai to shukr ye hai ki muñh se bolo

ki kuchh dinoñ meñ na muñh rahegā na muñh meñ chaltī zabāñ rahegī

bahār ke taḳht-o-tāj par bhī guloñ ko rote hī ham ne dekhā

ki gaaḌ kar ḳhār-o-ḳhas kā jhanDā chaman meñ ik din ḳhizāñ rahegī

dikhā.egā apnā jab vo qāmat machegī yaañ tarfa ik qayāmat

na vā.izoñ meñ ye zikr hogā na masjidoñ meñ azaañ rahegī

bajegā kūchoñ meñ yūñhī ghanTa azaañ yūñhī hogī masjidoñ meñ

na jab talak un ko tū milegā tamām āh-o-fuġhāñ rahegī

na deñge jab tak nigah ko dil ham qarār hāsil na hogā dil ko

kabhī na ham saañs le sakeñge uḌī huī ik sināñ rahegī

zabāñ pe 'shahbāz' kī haiñ jaarī mudām shīrīñ-laboñ kī bāteñ

ḳhudā ne chāhā to nok-e-ḳhāma hamesha ratb-ul-lisāñ rahegī

na apna baqi ye tan rahega na tan mein tab o tawan rahegi

agar judai mein jaan rahegi tumhin batao kahan rahegi

mizha ke tiron se chhan dil ko jo chhanni ho nigah ko gahri

khinchi hui dil se kab talak yun teri bhawon ki kaman rahegi

KHuda ne munh mein zaban di hai to shukr ye hai ki munh se bolo

ki kuchh dinon mein na munh rahega na munh mein chalti zaban rahegi

bahaar ke taKHt-o-taj par bhi gulon ko rote hi hum ne dekha

ki gaD kar KHar-o-KHas ka jhanDa chaman mein ek din KHizan rahegi

dikhaega apna jab wo qamat machegi yan tarfa ek qayamat

na waizon mein ye zikr hoga na masjidon mein azan rahegi

bajega kuchon mein yunhi ghanTa azan yunhi hogi masjidon mein

na jab talak un ko tu milega tamam aah-o-fughan rahegi

na denge jab tak nigah ko dil hum qarar hasil na hoga dil ko

kabhi na hum sans le sakenge uDi hui ek sinan rahegi

zaban pe 'shahbaz' ki hain jari mudam shirin-labon ki baaten

KHuda ne chaha to nok-e-KHama hamesha ratb-ul-lisan rahegi