na kuchh aalim samajhte hain na kuchh jahil samajhte hain

na kuchh aalim samajhte haiñ na kuchh jāhil samajhte haiñ

mohabbat kī haqīqat ko bas ahl-e-dil samajhte haiñ

nishān-e-manzil-e-maqsūd pā kar bhī na jo Thahre

usī rahrav ko ham āsūda-e-manzil samajhte haiñ

tire sahrā-navardoñ kā mazāq-e-justujū tauba

ġhubār-e-rāh ko ye parda-e-mahmil samajhte haiñ

tumhīñ se hai ye nūr-e-sham.a aur ye soz-e-parvāna

tumhīñ ko ahl-e-mahfil raunaq-e-mahfil samajhte haiñ

na duniyā bā.is-e-ġhaflat na uqbā vaj.h-e-hushyārī

rahe jo tujh se ġhāfil ham use ġhāfil samajhte haiñ

yahāñ to qābil-e-afsos haiñ dushvāriyāñ un kī

tumhārī raah meñ mushkil ko jo mushkil samajhte haiñ

unhīñ ko tere tīr-e-nīm-kash kā lutf aatā hai

na siine ko jo siina aur na dil ko dil samajhte haiñ

gul-e-maqsūd se phir kyuuñ use vo bhar nahīñ dete

mire dāman ko jab vo kāsa-e-sā.il samajhte haiñ

koī samjhe na samjhe is haqīqat ko magar 'najmī'

ham apne dard-e-dil ko ishq kā hāsil samajhte haiñ

na kuchh aalim samajhte hain na kuchh jahil samajhte hain

mohabbat ki haqiqat ko bas ahl-e-dil samajhte hain

nishan-e-manzil-e-maqsud pa kar bhi na jo Thahre

usi rahraw ko hum aasuda-e-manzil samajhte hain

tere sahra-nawardon ka mazaq-e-justuju tauba

ghubar-e-rah ko ye parda-e-mahmil samajhte hain

tumhin se hai ye nur-e-shama aur ye soz-e-parwana

tumhin ko ahl-e-mahfil raunaq-e-mahfil samajhte hain

na duniya bais-e-ghaflat na uqba wajh-e-hushyari

rahe jo tujh se ghafil hum use ghafil samajhte hain

yahan to qabil-e-afsos hain dushwariyan un ki

tumhaari rah mein mushkil ko jo mushkil samajhte hain

unhin ko tere tir-e-nim-kash ka lutf aata hai

na sine ko jo sina aur na dil ko dil samajhte hain

gul-e-maqsud se phir kyun use wo bhar nahin dete

mere daman ko jab wo kasa-e-sail samajhte hain

koi samjhe na samjhe is haqiqat ko magar 'najmi'

hum apne dard-e-dil ko ishq ka hasil samajhte hain