na puchh hijr mein jo haal ab hamara hai

na pūchh hijr meñ jo haal ab hamārā hai

umīd-e-vasl hī par in dinoñ guzārā hai

na dekhūñ tujh ko to aatā nahīñ kuchh aah nazar

tū merī putlī kā āñkhoñ kī yaar taarā hai

mujhe jo baam pe shab ko bulā.e hai vo maah

magar uruuj pe kyā in dinoñ sitārā hai

yaqīn jaan tū vaa.iz ki diin o duniyā meñ

bas us kī sirf mujhe zaat kā sahārā hai

ajab tarah se nazar paḌ gayā mire hamdam

qayāmat aah vo mukhḌā bhī pyārā pyārā hai

mujhe jo dostī hai us ko dushmanī mujh se

na iḳhtiyār hai us kā na merā chārā hai

kahā jo maiñ ne pilāte ho bazm meñ sab ko

magar hameñ hī nahīñ kyā gunah hamārā hai

to bole vo ki jise chāheñ ham pilā.eñ sharāb

ḳhushī hamārī tirā is meñ kyā ijārā hai

gayā vo parda-nashīñ jab se apne ghar 'ġhamgīñ'

tamām ḳhalq se dil ko mire kinārā hai

na puchh hijr mein jo haal ab hamara hai

umid-e-wasl hi par in dinon guzara hai

na dekhun tujh ko to aata nahin kuchh aah nazar

tu meri putli ka aankhon ki yar tara hai

mujhe jo baam pe shab ko bulae hai wo mah

magar uruj pe kya in dinon sitara hai

yaqin jaan tu waiz ki din o duniya mein

bas us ki sirf mujhe zat ka sahaara hai

ajab tarah se nazar paD gaya mere hamdam

qayamat aah wo mukhDa bhi pyara pyara hai

mujhe jo dosti hai us ko dushmani mujh se

na iKHtiyar hai us ka na mera chaara hai

kaha jo main ne pilate ho bazm mein sab ko

magar hamein hi nahin kya gunah hamara hai

to bole wo ki jise chahen hum pilaen sharab

KHushi hamari tera is mein kya ijara hai

gaya wo parda-nashin jab se apne ghar 'ghamgin'

tamam KHalq se dil ko mere kinara hai