nahin hawa mein ye bu nafa-e-KHutan ki si

nahīñ havā meñ ye bū nāfa-e-ḳhutan kī sī

lapaT hai ye to kisī zulf-e-pur-shikan kī sī

maiñ hañs ke is liye muñh chūmtā huuñ ġhunche kā

ki kuchh nishānī hai us meñ tire dahan kī sī

ḳhudā ke vāste gul ko na mere haath se lo

mujhe bū aatī hai is meñ kisī badan kī sī

hazār tan ke chaleñ bāñke ḳhūb-rū lekin

kisī meñ aan nahīñ tere bāñkpan kī sī

mujhe to us pe nihāyat hī rashk aatā hai

ki jis ke haath ne poshāk tere tan kī sī

kahā jo tum ne ki mankā Dhalā to ā.ūñgā

hai baat kuchh na kuchh is meñ bhī makr-o-fan kī sī

vagarna sach hai to ai jaan itnī muddat meñ

yahī bas ek kahī tum ne mere man kī sī

vo dekh shaiḳh ko lā-haul paḌh ke kahtā hai

''ye aa.e dekhiye dāḌhī lagā.e san kī sii''

kahāñ tū aur kahāñ us parī kā vasl 'nazīr'

miyāñ tū chhoḌ ye bāteñ divāne-pan kī sī

nahin hawa mein ye bu nafa-e-KHutan ki si

lapaT hai ye to kisi zulf-e-pur-shikan ki si

main hans ke is liye munh chumta hun ghunche ka

ki kuchh nishani hai us mein tere dahan ki si

KHuda ke waste gul ko na mere hath se lo

mujhe bu aati hai is mein kisi badan ki si

hazar tan ke chalen banke KHub-ru lekin

kisi mein aan nahin tere bankpan ki si

mujhe to us pe nihayat hi rashk aata hai

ki jis ke hath ne poshak tere tan ki si

kaha jo tum ne ki manka Dhala to aaunga

hai baat kuchh na kuchh is mein bhi makr-o-fan ki si

wagarna sach hai to ai jaan itni muddat mein

yahi bas ek kahi tum ne mere man ki si

wo dekh shaiKH ko la-haul paDh ke kahta hai

ye aae dekhiye daDhi lagae san ki si

kahan tu aur kahan us pari ka wasl 'nazir'

miyan tu chhoD ye baaten diwane-pan ki si