nahin kisi ki tawajjoh KHud-agahi ki taraf

nahīñ kisī kī tavajjoh ḳhud-āgahī kī taraf

koī kisī kī taraf hai koī kisī kī taraf

tumhārā jalva-e-ma.asūm dekh le ik baar

ḳhayāl jis kā na jaatā ho bandagī kī taraf

mizāj-e-shaiḳh-o-barhaman kī barhamī ma.alūm

ki ab hayāt kā ruḳh hai ḳhud-āgahī kī taraf

nazar vo log ujāle meñ ḳhud na aa.e kabhī

bulā rahe haiñ jo duniyā ko raushnī kī taraf

jatā rahe haiñ hamīñ ko na dekhnā apnā

vo dekh dekh ke mahfil meñ har kisī kī taraf

hazār baar irāda kiye baġhair bhī ham

chale haiñ uTh ke to aksar ga.e usī kī taraf

butoñ ne muñh na lagāyā 'adīb' ko shāyad

jhuke hue haiñ jabhī to ye shaiḳh-jī kī taraf

nahin kisi ki tawajjoh KHud-agahi ki taraf

koi kisi ki taraf hai koi kisi ki taraf

tumhaara jalwa-e-masum dekh le ek bar

KHayal jis ka na jata ho bandagi ki taraf

mizaj-e-shaiKH-o-barhaman ki barhami malum

ki ab hayat ka ruKH hai KHud-agahi ki taraf

nazar wo log ujale mein KHud na aae kabhi

bula rahe hain jo duniya ko raushni ki taraf

jata rahe hain hamin ko na dekhna apna

wo dekh dekh ke mahfil mein har kisi ki taraf

hazar bar irada kiye baghair bhi hum

chale hain uTh ke to aksar gae usi ki taraf

buton ne munh na lagaya 'adib' ko shayad

jhuke hue hain jabhi to ye shaiKH-ji ki taraf