nai zamin na koi aasman mangte hain

na.ī zamīñ na koī āsmān māñgte haiñ

bas ek gosha-e-amn-o-amān māñgte haiñ

kuchh ab ke dhuup kā aisā mizāj bigḌā hai

daraḳht bhī to yahāñ sā.ebān māñgte haiñ

hameñ bhī aap se ik baat arz karnā hai

par apnī jaan kī pahle amaan māñgte haiñ

qubūl kaise karūñ un kā faisla ki ye log

mire ḳhilāf hī merā bayān māñgte haiñ

hadaf bhī mujh ko banānā hai aur mere harīf

mujhī se tiir mujhī se kamān māñgte haiñ

na.ī fazā ke parinde haiñ kitne matvāle

ki bāl-o-par se bhī pahle uḌaan māñgte haiñ

nai zamin na koi aasman mangte hain

bas ek gosha-e-amn-o-aman mangte hain

kuchh ab ke dhup ka aisa mizaj bigDa hai

daraKHt bhi to yahan saeban mangte hain

hamein bhi aap se ek baat arz karna hai

par apni jaan ki pahle aman mangte hain

qubul kaise karun un ka faisla ki ye log

mere KHilaf hi mera bayan mangte hain

hadaf bhi mujh ko banana hai aur mere harif

mujhi se tir mujhi se kaman mangte hain

nai faza ke parinde hain kitne matwale

ki baal-o-par se bhi pahle uDan mangte hain