nairangi-e-KHayal pe hairat nahin hui

nairañgī-e-ḳhayāl pe hairat nahīñ huī

mujh ko kisī kamāl pe hairat nahīñ huī

merī tabāh-hālī ko bhī dekh kar use

hairat hai mere haal pe hairat nahīñ huī

pūchhā thā maiñ ne jab use kyā mujh se ishq hai?

us ko mire savāl pe hairat nahīñ huī

dekhā jo ek umr ke ba.ad us ne aa.inā

ḳhud apne ḳhad-o-ḳhāl pe hairat nahīñ huī

ik umr se maiñ rafta-e-raftār-e-yār huuñ

mujh ko ram-e-ġhazāl pe hairat nahīñ huī

āḳhir ġhurūb honā hī thā āftāb-e-umr

mujh ko mire zavāl pe hairat nahīñ huī

vo shaḳhs is jahān kā thā hī nahīñ kabhī

'sāhir' ke intiqāl pe hairat nahīñ huī

nairangi-e-KHayal pe hairat nahin hui

mujh ko kisi kamal pe hairat nahin hui

meri tabah-haali ko bhi dekh kar use

hairat hai mere haal pe hairat nahin hui

puchha tha main ne jab use kya mujh se ishq hai?

us ko mere sawal pe hairat nahin hui

dekha jo ek umr ke baad us ne aaina

KHud apne KHad-o-KHal pe hairat nahin hui

ek umr se main rafta-e-raftar-e-yar hun

mujh ko ram-e-ghazal pe hairat nahin hui

aaKHir ghurub hona hi tha aaftab-e-umr

mujh ko mere zawal pe hairat nahin hui

wo shaKHs is jahan ka tha hi nahin kabhi

'sahir' ke intiqal pe hairat nahin hui