naqshe usi ke dil mein hain ab tak khinche hue

naqshe usī ke dil meñ haiñ ab tak khiñche hue

vo daur-e-ishq thā ki baḌe ma.arke hue

itnā to thā ki vo bhī musāfir-navāz the

majnūñ ke saath the jo bagūle lage hue

aa.ī hai us se pichhle pahar guftugū kī yaad

vo ḳhalvat-e-visāl vo parde chhuTe hue

kyuuñ ham-nafas chalā hai tū un ke surāġh meñ

jis ishq-e-be-ġharaz ke nishāñ haiñ miTe hue

ye mai-kada hai is meñ koī qaht-e-mai nahīñ

chalte raheñge chand subū dam kiye hue

kal shab se kuchh ḳhayāl mujhe but-kade kā hai

suntā huuñ ik charāġh jalā ratjage hue

merī vafā hai us kī udāsī kā ek baab

muddat huī hai jis se mujhe ab mile hue

allāh-re faiz-e-bāda-parastān-e-pesh-rau

nikle zamīñ se shīsha-e-mai kuchh dabe hue

maiñ bhī to ek sub.h kā taara huuñ tez-rau

āp-apnī raushnī meñ akele chale hue

naqshe usi ke dil mein hain ab tak khinche hue

wo daur-e-ishq tha ki baDe marke hue

itna to tha ki wo bhi musafir-nawaz the

majnun ke sath the jo bagule lage hue

aai hai us se pichhle pahar guftugu ki yaad

wo KHalwat-e-visal wo parde chhuTe hue

kyun ham-nafas chala hai tu un ke suragh mein

jis ishq-e-be-gharaz ke nishan hain miTe hue

ye mai-kada hai is mein koi qaht-e-mai nahin

chalte rahenge chand subu dam kiye hue

kal shab se kuchh KHayal mujhe but-kade ka hai

sunta hun ek charagh jala ratjage hue

meri wafa hai us ki udasi ka ek bab

muddat hui hai jis se mujhe ab mile hue

allah-re faiz-e-baada-parastan-e-pesh-rau

nikle zamin se shisha-e-mai kuchh dabe hue

main bhi to ek subh ka tara hun tez-rau

aap-apni raushni mein akele chale hue