nashsha-e-shauq hai fuzun shab ko abhi sahar na kar

nashsha-e-shauq hai fuzūñ shab ko abhī sahar na kar

dekh hadīsh-e-dil-barāñ itnī bhī muḳhtasar na kar

saarā hisāb-e-jān-o-dil rakkhā hai tere sāmne

chāhe to de amaañ mujhe chāhe to darguzar na kar

apnoñ se haar jiit kā kaise karegā faisla

ai mire dil Thahar zarā ye jo muhim hai sar na kar

us kā ye husn vahm hai terā ye ishq hai gumāñ

itnā yaqīn dil mire vahm-o-gumān par na kar

hijrat-e-nau kā mas.ala baḌhte qadam na rok le

so mirī jaañ safar meñ rah dār-e-fanā meñ ghar na kar

itnā to vaqt de kabhī ḳhud se karūñ mukālima

ai mirī umr-e-tez-rau aise mujhe basar na kar

merī uḌaan hai mare rabb-e-karīm kī atā

yuuñ mire zid meñ muntashir apne ye bāl-o-par na kar

nashsha-e-shauq hai fuzun shab ko abhi sahar na kar

dekh hadish-e-dil-baran itni bhi muKHtasar na kar

sara hisab-e-jaan-o-dil rakkha hai tere samne

chahe to de aman mujhe chahe to darguzar na kar

apnon se haar jit ka kaise karega faisla

ai mere dil Thahar zara ye jo muhim hai sar na kar

us ka ye husn wahm hai tera ye ishq hai guman

itna yaqin dil mere wahm-o-guman par na kar

hijrat-e-nau ka masala baDhte qadam na rok le

so meri jaan safar mein rah dar-e-fana mein ghar na kar

itna to waqt de kabhi KHud se karun mukalima

ai meri umr-e-tez-rau aise mujhe basar na kar

meri uDan hai mare rabb-e-karim ki ata

yun mere zid mein muntashir apne ye baal-o-par na kar