nazar hai jalwa-e-jaanan hai dekhiye kya ho

nazar hai jalva-e-jānāñ hai dekhiye kyā ho

shikast-e-ishq kā imkāñ hai dekhiye kyā ho

abhī bahār-e-guzishta kā ġham miTā bhī nahīñ

phir ehtimām-e-bahārāñ hai dekhiye kyā ho

qadam uThe bhī nahīñ bazm-e-nāz kī jānib

ḳhayāl abhī se pareshāñ hai dekhiye kyā ho

kisī kī raah meñ kāñTe kisī kī raah meñ phuul

hamārī raah meñ tūfāñ hai dekhiye kyā ho

ḳhirad kā zor hai ārā.ish-e-gulistāñ par

junūñ harīf-e-bahārāñ hai dekhiye kyā ho

jis ek shāḳh pe buniyād hai nasheman kī

vo ek shāḳh bhī larzāñ hai dekhiye kyā ho

hai aaj bazm meñ phir izn-e-ām saaqī kā

'qamar' hunūz musalmāñ hai dekhiye kyā ho

nazar hai jalwa-e-jaanan hai dekhiye kya ho

shikast-e-ishq ka imkan hai dekhiye kya ho

abhi bahaar-e-guzishta ka gham miTa bhi nahin

phir ehtimam-e-bahaaran hai dekhiye kya ho

qadam uThe bhi nahin bazm-e-naz ki jaanib

KHayal abhi se pareshan hai dekhiye kya ho

kisi ki rah mein kanTe kisi ki rah mein phul

hamari rah mein tufan hai dekhiye kya ho

KHirad ka zor hai aaraish-e-gulistan par

junun harif-e-bahaaran hai dekhiye kya ho

jis ek shaKH pe buniyaad hai nasheman ki

wo ek shaKH bhi larzan hai dekhiye kya ho

hai aaj bazm mein phir izn-e-am saqi ka

'qamar' hunuz musalman hai dekhiye kya ho