nazar mein ek jahan hai aur tamanna ka jahan wo bhi

nazar meñ ik jahāñ hai aur tamannā kā jahāñ vo bhī

jo tair-e-fikr hai rahtā hai har-dam par-fishāñ vo bhī

zarā Thahro ki paḌh luuñ kyā likhā mausam kī bārish ne

mirī dīvār par likhtī rahī hai dāstāñ vo bhī

mohabbat meñ diloñ par jaane kab ye sāneha guzrā

jagah shak ne banā lī aur hamāre darmiyāñ vo bhī

suno ai raftagāñ rahtā nahīñ kuchh fāsla itnā

bas ik dīvār baaqī hai mirī dīvār-e-jāñ vo bhī

jahāñ par nā-rasā.ī hī riyāzat kā sila Thahre

hameñ dil ne sikhā rakkhā hai ik kār-e-ziyāñ vo bhī

na.e imkān kī jānib safar meñ jab taraddud ho

sadā kānoñ meñ aatī hai sadā-e-kun-fakāñ vo bhī

kisī dildār saa.at meñ kisī mahbūb lahje kā

dikhātī hai tamāsha aur mirī umr-e-ravāñ vo bhī

nazar mein ek jahan hai aur tamanna ka jahan wo bhi

jo tair-e-fikr hai rahta hai har-dam par-fishan wo bhi

zara Thahro ki paDh lun kya likha mausam ki barish ne

meri diwar par likhti rahi hai dastan wo bhi

mohabbat mein dilon par jaane kab ye saneha guzra

jagah shak ne bana li aur hamare darmiyan wo bhi

suno ai raftagan rahta nahin kuchh fasla itna

bas ek diwar baqi hai meri diwar-e-jaan wo bhi

jahan par na-rasai hi riyazat ka sila Thahre

hamein dil ne sikha rakkha hai ek kar-e-ziyan wo bhi

nae imkan ki jaanib safar mein jab taraddud ho

sada kanon mein aati hai sada-e-kun-fakan wo bhi

kisi dildar saat mein kisi mahbub lahje ka

dikhati hai tamasha aur meri umr-e-rawan wo bhi