nazzara-e-jamal ne sone nahin diya

nazzāra-e-jamāl ne sone nahīñ diyā

shab bhar tire ḳhayāl ne sone nahīñ diyā

pahle naved-e-vasl mirī niind le uḌī

phir nashsha-e-visāl ne sone nahīñ diyā

jis roz us ke jhuuT kī sachchā.iyāñ khulīñ

suqrāt kī misāl ne sone nahīñ diyā

kis ḳhūb-sūratī se judā kar diyā hameñ

dushman ke is kamāl ne sone nahīñ diyā

jo bhiik māñgte hue bachche ke paas thā

us kāsa-e-savāl ne sone nahīñ diyā

shab bhar maiñ jāgtī rahī jis ranj ke sabab

din ko bhī us malāl ne sone nahīñ diyā

kitnī thakan safar kī thī par vāpsī kī shaam

is shauq-e-arz-e-hāl ne sone nahīñ diyā

'rūhī' maiñ ḳhvāb-e-ishq se jaagī to us ke baad

kitne hī māh-o-sāl ne sone nahīñ diyā

nazzara-e-jamal ne sone nahin diya

shab bhar tere KHayal ne sone nahin diya

pahle nawed-e-wasl meri nind le uDi

phir nashsha-e-visal ne sone nahin diya

jis roz us ke jhuT ki sachchaiyan khulin

suqraat ki misal ne sone nahin diya

kis KHub-surati se juda kar diya hamein

dushman ke is kamal ne sone nahin diya

jo bhik mangte hue bachche ke pas tha

us kasa-e-sawal ne sone nahin diya

shab bhar main jagti rahi jis ranj ke sabab

din ko bhi us malal ne sone nahin diya

kitni thakan safar ki thi par wapsi ki sham

is shauq-e-arz-e-haal ne sone nahin diya

'ruhi' main KHwab-e-ishq se jagi to us ke baad

kitne hi mah-o-sal ne sone nahin diya