paband-e-ehtiyat-e-wafa bhi na ho sake

pāband-e-ehtiyāt-e-vafā bhī na ho sake

ham qaid-e-zabt-e-ġham se rihā bhī na ho sake

dār-o-madār-e-ishq vafā par hai ham-nashīñ

vo kyā kare ki jis se vafā bhī na ho sake

go umr bhar na mil sake aapas meñ ek baar

ham ek dūsre se judā bhī na ho sake

jab juzv kī sifāt meñ kul kī sifāt haiñ

phir vo bashar hī kyā jo ḳhudā bhī na ho sake

ye faiz-e-ishq thā ki huī har ḳhatā muaaf

vo ḳhush na ho sake to ḳhafā bhī na ho sake

vo āstān-e-dost pe kyā sar jhukā.egā

jis se buland dast-e-duā bhī na ho sake

ye ehtirām thā nigah-e-shauq kā jo tum

be-parda ho sake jalva-numā bhī na ho sake

'maḳhmūr' kuchh na pūchhiye majbūri-e-hayāt

achchhī tarah ḳharāb-e-fanā bhī na ho sake

paband-e-ehtiyat-e-wafa bhi na ho sake

hum qaid-e-zabt-e-gham se riha bhi na ho sake

dar-o-madar-e-ishq wafa par hai ham-nashin

wo kya kare ki jis se wafa bhi na ho sake

go umr bhar na mil sake aapas mein ek bar

hum ek dusre se juda bhi na ho sake

jab juzw ki sifat mein kul ki sifat hain

phir wo bashar hi kya jo KHuda bhi na ho sake

ye faiz-e-ishq tha ki hui har KHata muaf

wo KHush na ho sake to KHafa bhi na ho sake

wo aastan-e-dost pe kya sar jhukaega

jis se buland dast-e-dua bhi na ho sake

ye ehtiram tha nigah-e-shauq ka jo tum

be-parda ho sake jalwa-numa bhi na ho sake

'maKHmur' kuchh na puchhiye majburi-e-hayat

achchhi tarah KHarab-e-fana bhi na ho sake